Owadlalela amaqembu abalisa eleHwange kanye leleDynamos uCarrington Gomba uthi kwasala kancane ukuthi azodlalela iqembu leHighlanders ngo2007.
UGomba uthi wayezimisele ukuyadlalela iqembu leHighlanders esuka kuqembu leHwange kodwa bachitheka sebugayiwe.
“Kwenzakala ngo2006, 2007 nxa ngingaphambanisi, ukuthi iqembu leHighlanders lalingifuna sibili kusaqeqetsha uMethembe. Wangifonela uMethembe savumelana kodwa angazi ukuthi kuyini okwenzakalayo ngoba ekucineni ngezwa sekuthiwa sengibhaliswe ukuba ngizadlalela iqembu leDynamos kumncintiswano wokudinga intshantshu zezwekazi laseAfrica.
Lanamhla lokhu angikwazi ukuthi kwenzakalani ngoba ngasengipakitshile lempahla zami sengilungele ukuya kuqembu leHighlanders,” kutsho uGomba.
UGomba uthi loba isifiso sakhe esokudlalela iqembu leHighlanders singasafezekanga, akalansolo ngoba efike wakholisa kakhulu kuqembu leDynamos.
“Ngangifisa sibili ukudlala kuBosso ngoba ngangilabangane ababeyidlalela esasihlangana kuqembu lesizwe abagoqela uHonour (Gombami), Oba (Tarumbwa), loVusa (Nyoni) ababengikhuthaza njalo lami ngangifuna sibili kodwa akusayenzekanga. Angisoli futhi ukuthi ngacina sengikuqembu leDynamos ngoba khonangale ngadlala kuzwekazi leAfrica kwaba mnandi,” kuchasisa uGomba.
UGomba ubeyingxenye yeqembu leDynamos eliphelele kusigaba se semi – final kumncintiswano weCAF Champions League ngomnyaka ka2008.
Uthi ukufananiswa lomdlali owaduma edlalela iqembu leDynamos uKallisto Pasuwa ngesikhathi esakhula yikho okwamkhuthaza ukuba abophe ziqine emdlalweni wenguqu.
“Okwangikhuthaza kakhulu yikuba abantu abanengi ababedlala ibhola babengibiza ngegama likaKallisto owayedlalela iqembu leDynamos. Ngake ngahlangana laye ngamtshela ukuthi abantu bangifanisa laye njalo angazi kumbe kungoba ngidlala njengaye yini. Kwangichaza kakhulu lokho ngoba ngakuthatha njengokuthi abantu bangibona njengomdlali omkhulu kangaka ebholeni njalo kwangenza lami ngibe ngumuntu ebholeni,” kutsho uGomba.
UGomba uzalelwe edolobheni leHwange mhla zinhlanu kunyanga kaMbimbitho ngo1985.
Udlalele amaqembu akweleZimbabwe abalisa eleHwange, eleGunners kanye leDynamos. Ngaphandle kwelizwe udlale kweleDemocratic Republic of Congo lapho adlalele amaqembu abalisa eleSt Etoi Lupopo kanye leleDon Bosco, kuthi ngaseZambia udlalele iqembu leRed Arrows.
Khathesi uyimeneja yeqembu leZPC Hwange lona alidlalele ekuphendukeni kwakhe kweleZimbabwe esesuka eZambia.
Your browser doesn’t support HTML5
Udaba Silwethulelwa ngu Joseph Njanji.