Abesifazane abavotayo kweleMelika bayedlula ingxenye yabantu belizwe lonke. Intathelizindaba ye VOA u-Scott Stearns ulobe loludaba olwethulwa yimi uChris Gande, oluveza ukuthi uMongameli Joe Biden loMnu. Donald benzani ukuhuga abavoti besifazane.
Okunengi okumunyethwe ngumkhankaso wokhetho lwalumnyaka kugxile kumithetho yokususa izisu, iabortion, lelungelo lokuzithwala.
Kodwa abesifazane beleMelika babhekane lokunengi kulokususa izisu okwenza imikhankaso igoqele lezenotho, ezempilakahle lokwephulwa komthetho.
Esigabeni se Minnesota, ovotayo, uNkosikazi Rebecca Jensen uthi uMongameli Joe Biden kumele angconye ngoba wenza okumele kwenziwe.
“Ngibona indaba eziphathelani lezemvelo ziqakathekile. Ngibona ezomnotho kunye lezempilakhle ziqakathekile. Ngingumongikazi njalo ngihlala ngidibana lomkhuhlane we COVID kanengi-nengi. Wonke umuntu uthi sesedlula isikahthi segcikwane, kodwa hatshi. Lokhu kutsho ukuthi ukuba lomuntu olandela ezolwazi lwe science esigodlenweni se White House kuhle kakhulu.”
Esigabeni se Nevada, ovotayo, uNkosikazi Julie Benb ufuna ukuthi uMnu. Donald Trump akhethwe okwesibili.
"Wayesenelisa umnotho welizwe. Kwakungela mpi. Kwakulokubambana. Sonke sasizebenza. Intengo yamafutha ezimota yayiphansi. Ngithi wayengumkhokheli woqotha. Ngumuntu olungileyo. Uthanda ilizwe lakhe. Wondla umndeni wakhe olesizotha, siyamfuna njalo."
U-Biden ulomkhankaso oqophe abavoti besifazane ngohlelo lwesigodlo se-White House esiphathelane lokucwayisisa kwempilakahle yabesifazane.
“Ungakhangela ukuphumelela ebesikwenza kwezemithi emhlabeni jikelele, kodwa abesifazane abananzwa. Ukucubungula kuthatha isikhathi ukufinyelela lina lonke.”
Umkhankaso ka Biden wethule ugwaliba ngelanga labomama ele Mother’s Day ochothoza imigoqo ka Trump eyokwehlukani izimuli zabokuza olulotshwe ukuthi: “Lungisela omama abesempilweni yakho. Vimba u-Trump.”
U-Trump utshele umhlangano wabomama bezokholo lwesi Khristu ukuthi uzaletha ukuthula kuzwekazi le Europe.
"Ningakangeni lasehofisini yomkhokheli welizwe, ngemva kokunqoba kukhetho, ngizahle ngimise impi embi ephakakthi kwele Russia lele Ukraine.”
U-Trump uzama ukuhuga abavoti besifazane ngembiko yokuqinisa isandla kwabephula umthetho lodaba lwezokungena elizweni ngokungekho emthethweni.
"Ngibona ngisenza kuhle kwabesifazane abahlala emadolobheni ngoba bafuna ukuhlala bephephile. Kodwa batshontshelwa ubucwebecwebe, inkombalanga lemali. Abantu bayaphenduka bazibuze ukuthi kanti kwenzakaleni? Nxa lifuna ukuthi angangena elizweni okungekho emthethweni bengangeni ezindlini zenu ngamafasiteli balintshontshele, kumele livotele ukuthi sisuse isehluleki esingu Joe Biden ngokutshetsha, ngoba sokonakele.”
Inhlanganiso ye Center for Americana Women and Politics ithi abesifazane yibo abanengi abavotayo kukhetho lukamongameli kusukela ngomnyaka ka 1980.
Ngomnyaka ka 2022, inhlanganiso ye Pew Research yaveza ukuba u-Biden wathola amavoti abesifazane adlula aka Trump ngokuyisilinganiso sokulitshumi lanye ekhulwini, 11 percent.
Your browser doesn’t support HTML5
Udaba lwabavoti besifazane.