Kukhetho lokuding umongameli weleMelika phakathi kukaMongameli Joe Biden loMnu. loMnu. Donald Trump kuzavota adabuka kuzwekazi le Asia abayizigidi ezimbili kulalabo abavota kukhetho olwenziwa kuminyaka emine esanda kwedlula, kutsho uphenyo lwe Pew Research Center.
Abadabuka kwele Asia behlala kweleMelika yibo abalenani elikhuphuka ngesiqubu, kuveza ucwaningo lwe Pew Research Institute oluthi kodwa kabavoti ngendlela efanayo.
Unkosikazi Christine Chen ngumqondisi wenhlanganiso yezizalwane zezwekazi le Asia engasekeli hlangothi eye Asian Pacific Islander American Vote, usipha umbono wakhe.
“Njengenhlalayenza, abadabuka kwele India lakwele Japan yibo abasekela ibandla lama Democrats ngobunengi kuthi abe Vietnam basekela abebandla lama Republicans. Okwakathesi, abadabuka kwele China sebeguquke bazimela ngemva kokutshengisa usekelo kuma Democrats. Lokhu kutsho ukuthi amabandla ezombusazwe awangeni ebantwini bebatshela ngenhlelo zabo."
UNKosikazi Michelle Steel udabuka kwele South Korea kodwa wakhulela kwele Japan. Ulilunga le dale le congress emele ibandla lama Republicans esigabeni se California edolobheni le Orange County. Ke sizwe imbono yakhe:
“Uyahamba nje emphakathini ukhulumisana lozulu ngendlela ezehlukeneyo. Njengokuthi kwabadabuka kwele Vietnam ngathenga izigqoko zabo ezinhlanu ngazigqoka. Nxa ngiya kwabe Phillipines ngigqoka impahla zabo ezohlobo lwe sari. Wenza konke lokhu ukuthi bakwamukele.”
U-Steel uthi yena labanye bakhe baqoqoda emizini efika inkulungwane phose ezingamakhulu amabili kuminyaka emibili edluleyo bedinga amavoti.
“Yiyo indlela yokufinyelela abadabuka kuzwekazi le Asia. Kuyafana, uyazi? Esiqintini sami, sonke sikhuluma indimi ezehlukenyo kodwa sonke sitsho okunye.”
Umkhankaso wokungena ezindlini uqakathekile kwabadabuka e-Asia, inengi labo abayisilinganiso sokungamatshumi ayisikhombisa ekhulwini bavota ngeposo ngomnyaka ka 2020, kutsho u-Chen.
“Kutsho ukuthi nxa uvota ngeposo, ungahlala etafuleni lakho emkulwini uxoxe lomndeni labangane ngabancintisayo, wenelise ukuhumutshelwe indimi wenelise ukubakwazi ukuthi uzavotela bani.”
UNkosikazi Grace Meng, lilunga ledale le congress engowebandla lama Democrats omele isiqinti se Queens esigabeni se New York.
"Ngicabanga ukuthi kube lumfutho kumkhankaso ngoba sibone abebandla lama Repubnlicans besenza umkhankaso wendimi ezitshiyeneyo. Besitshela inkokheli yebandla lethu lama Democrats ukuthi khangelani asingeke salinda. Abelinye ibandla sebesihahabela. Kumele sibe lesiqiniseko sokuthi uzulu uyazi inhlelo zethu lokuthi simeleni lokuveza ubuntu bethu."
UNkosikazi Sandra Choi ngumqondisi wenhlananiso ye MinKwon Center for Community Action. Ke sizwe imbono yakhe:
“Sisebenza kukho minyaka yonke, siqiniso usekelo lwabokuza, abadabuka e-Asia abasebenzayo – ikakhulu ngokhetho lomnyaka ka 2024, oluqakatheke kakhulu. Siyazi ukuthi lesi yisikhathi sokuhuga umphakathi ukuze wazi amandla abo wokwakha okukhulu, elakusasa eliqhakazekileyo.”
Inhlanganiso ethula uphenyo, eye Pew Research ithi abantu abadabuka kuzwekazi le Asia abedlula izigidi ezilitshumi lanhlanu 15 million bazabe besenelisa ukuvota ngenyanga ka Lwezi.
Abedlula ingxeya behala kuzigaba ezinhlanu kuphela ezibalisa: i-California, New York, Texas, Hawaii le New Jersey.
Your browser doesn’t support HTML5
Udaba lwezokhetho.