Oncintisa kukhetho lokudinga umongameli wele Melika, umnumzana Donald Trump ubekhangelelwe ukukhankasa edinga usekelo lokuvotelwa esigabeni ese Michigan. Lesi ngesinye sezigaba esilakho ukumengezela inani labamvotelayo ukuze anqobe kulolu khetho oluzaqhutshwa ngoLwezi lonyaka
Abavotayo eMichigan bakhetha uDonald Trump ngomnyaka ka 2016 kodwa ngomnyaka ka 2020 bakhetha uJoe Biden. Kungalesi sizatho bonke bobabili, belethemba lokuthi bangasithatha lesi sigaba ngoLwezi.
U Trump ubikwa efuna ukuqondisa owakhe umkhankaso kuzisebenzi ezilungisa izimota eMichigan, ngoba zilakho ukuphelelwa yimisebenzi ngenxa yenhlelo zika Biden, zokuvimba ukungcoliswa komoya ophefunyulwa ngabantu ngokukhuthaza ukulungiswa kwezimota ezisebenzisa amandla kagetsi kulalezo abazilungisayo ezisebenzisa amafutha epetulu.
Lumbiko yiwo abe hamba ngawo emhlanganweni omkhulu owenzelwe esigabeni seMichigan ngoLwesithathu.
“Sizaba siseMichigan, okuyisigaba asesibhidlizile ngokuphazamisa umsebenzi wokulungiswa kwezimota. Kuzasala kungasela misebenzi yokulungiswa kwezimota eMichigan. Kungasela ngitsho. Yonke izasiwa eChina lakwamanye amazwe ngaleli nyathela lakhe lezimotha zikagetsi.”
Kodwa umanyano wezisebenzi zaseMichigan usuveze ukuba usekela uBiden kulo Trump.
U Paul Torrente umela izisebenzi.
“U Donald Trump ulakho ukuthola usekelo kumankampani amakhulu ase Michigan ngoba kuyiwo ancindezela izisebenzi. Ngakhoke nxa esithi iMichigan ngeyakhe, uyabe esitsho abaqhatshi, abayisilinganiso sokunye ekhulwini-one percent, hatshi izisebenzi.’’
Lesi yiso isiqokoqela somkhankaso kaBiden sokuqakathekisa abavotayo abazimuli zezisebenzi lapho abikwa ngumsakazo oweNBC News, ukuthi ulosekelo olukhulu ukwedlula uTrump.
“Iphupho likaDonald Trump ngeMelika ngolokuthi libe lilizwe lokuphindisela lokujezisa bonke abamwonelayo. Umuntu owanqotshwa enguye umongameli ubona umhlaba njengomuzi wakhe owe Mar-a-Lago, efuna ukugcwalisa izifiso zezinothi hatshi imuli zezisebenzi. Ayisikho ukuthi akasekeli kuphela kodwa uyaseyisa thina njengezisebenzi.”
Kodwa udubo angabhekana lalo uBiden eMichigan, yilabo abakubandla lakhe lamaDemocrats lalabo abaphambana lenyathela lakhe lokusekela ele Israel empini yase Gaza.
U -Omar Suleiman ngumkhokheli wabokholo lwesi Islam esigabeni seMichigan abe Islamic Center of Detroit. Ke sizwe amazwi akhe:
“Ukhanya ekhuthele, izibopho zakhe ngibona zinyanyisa, njalo uyazikholisa nxa ecabanga ukuthi kuzamenza anqobe ngoLwezi.”
Emangweni owe Adams Township, esigabeni se Michigan, kulabanye ababona angani uBiden kaluphathanga kuhle udaba lwabokuza, kutsho umqondisi walei dolobho uRandy Johnson.
“Ungakhangela bangaki sibili abantu ababuyileyo, ngingasatsho ngendlela embi kodwa kusobala ukuthi ababuye ukuzosekela uTrump ngabokuza kulesi sigaba njalo akalalo usekelo kulindawo.”
U Trump yena uthi uzulu waseMichigan usediniwe ngombuso kaBiden.
"NgoLwezi uzulu wase Michigan, ngevoti yabo bazamtshela uguluva uJoe Biden, akaphume aphele kulindawo.”
U Biden yena uthi ukumanyana kwezisebenzi zakulindawo yikho okuzakwenza anqobe.
"Liqakathekile bantu beMichigan. Yini elangivotelayo ngomnyaka ka 2020. Ukuthi ngibe lapha njengomongameli weleMelika kungenxa yenu lina bantu baseMichigan. Kuliqiniso lokho. Ngenxa yenu kukhetho lwalonyaka luka2024, sizamnqoba uDonald Trump angaphindi wanqoba."
Uphenyo olwenziwe ngabomsakazo oweCBS News poll luveza ukuba uBiden ulemiklomelo ephezulu yokusekelwa kulesi sigaba ukwedlula kancane uTrump, kulababili kokuthathu kuzulu weMichigan abathi kuqakathekile ukuthi uzulu avote kulolu khetho.