Sokusele inyanga eziyisithupha nje kuphela ukuthi kwenziwe ukhetho lokudinga umongameli weleMelika lapho umongameli Joe Biden, owebandla lama Democrats azancintisana khona loMnu. Donald Trump webandla lama Republicans. Intathelizindaba ye VOA u-Scott Stearns uhlaziya okukhangelelwe ukwenzakala kulumkhankaso kudaba olwethulwe yimi uChris Gande.
Umongameli Joe Biden loMnu. Donald Trump basalelwe zinyanga eziyisithupha nje kuphela ukuthi bakhange amavoti okubapha ihlandla lesibili lombuso.
U-Trump uzaqeda esinye salesi sikhathi esemthethwandaba ethoniswa amacala amane aphathelane lokungaphathi kuhle amaphepha alemfihlo esizwe lokuqamba amanga kwezamabhizimusi.
Kodwa yena uthi abatshutshisi bayangenela kukhetho.
“Konke kwakusemthethweni. Benza konke lokhu ngoba ngezombusazwe. Bafuna ukuthi u-Biden akhethwe. Yiyo nje injongo yabo,” kutsho u-Trump.
Ukuba emthethwandaba kucitha isikhathi sokukhankasa esika Trump kodwa uthi lokhu akuchaza njengokumhlukuluza kumemza athole usekelo olukhulu kubavoti.
Kutsho u-Trump: “Yisihluku esenzakala elizweni. Ngiyathemba ukuthi mhla ziku 5 ngoLwezi, ilanga eliqakathekileyo embalini yelizwe lethu, ngombono wami – ilanga elithiwa ngelokhetho – ngilethemba kuzaguquka ngoba laba bantu babulala ilizwe.”
Ibandla lama Republicans lakhetha u-Trump ukuthi alimele kukhetho lukamongameli ngomnyaka ka 2020 emhlanganweni we North Carolina owenzelwa ebulenjini.
Lumnyaka umhlangano omkhulu webandla lama Republicans ungoNtulikazi esigabeni se Wisconsin. Kodwa phambilini kwalokhu, u-Trump kumele akhethe ozakuba ngumsekeli wakhe.
Kulabo abakhangelelwe ukukhethwa ukuba ngumsekeli ka Trump yilaba:
Usenetha weFlorida uMnu. Marco Rubio, Usenetha we Ohio uMnu. J.D. Vance,
uSenetha we South Carolina uMnu. Tim Scott, lomela isigaba se New York kudale le House, Unkosikazi Elise Stefanik.
Ongumongameli okwakathesi, uMnu. Biden ulethuba lokusebenzisa isigodlo se White House ukuthuthukisa amathuba akhe.
Emkhankasweni uMongameli Biden useqinise isandla ekuhlaseleni u-Trump ezitshaya isifuba ngokuvuselela umnotho.
“Ukuvuselelwa kwamafekitali amatsha sokuphindwe kabili embusweni wami. Ngakwelinye icele, uMnu. Donald Trump ucaba ukuthi imitshina yama windmill ibangela umkhuhlane we cancer. Yikho akutshoyo. Liyakhumbula, laphana ezama ukulwisana le COVID? Wathi abahlatshwe ijekiseni ele jik egazini. Waphosisa – konke kwaya enweleni zakhe,” kutsho u- Joe Biden))
Ibandla le Democratic Party lakhetha u-Biden ukuba ngumongameli emhlanganweni walo webulenjini esigabeni se Wisconsin.
Umhlangano webandla le Democratic Party owe convention usesigabeni se Illinois ngoNcwabakazi ngomnyaka ka 2020.
Umongameli Biden uzancintisa njalo esekelwa ngumsekeli wakhe, uNkosikazi Kamala Harris, ubekhankasela ukuvikelwa kwelungelo lokususa izisu, i-abortion kulandela ukumiswa umthetho ophathelane lo Roe v Wade ngomnyaka ka 2022.
"UMnu. Donald Trump ngumongameli owacitha umthetho owawivikela abesifazane owe Roe. Umongameli Joe Biden uzakuba ngumongameli ozabuyisela ovikela abesifazane owe Roe," kutsho uNkosikazi Kamala Harris.
Kungakafiki ukhetho luka Lwezi, u-Biden lo Trump bathi bazilungisele ukubindana kungxoxo-mpikiswano. Kodwa akukabekwa ilanga lapho abazadibaka khona.
Your browser doesn’t support HTML5
Udaba lwezokhetho lweMelika.