Ikhansili yedolobho lakoBulawayo ngoMvulo ihlangene labosomabhizimusi lapho okucutshungulwe khona uhlelo lokwakhiwa kwedamu elizabizwa ngokuthi yi Glassblock kumbe Bopoma elikhangelelwe ukuthi lilethele lelidolobho amanzi ngisiphangi-phangi.
IBopoma yindawo lapho okuzakwakhiwa khona leli idamu.
Eloba enkundleni yebulenjini eye X, usodolobho wakoBulawayo uKhansila David Coltart uthi uhlelo lolu luzasebenza kuze kufike umnyaka ka 2037 lapho okuyabe sokudingakala khona ukuthi kube lamanzi avela ku Gwayi-Tshangani, lezinye inhlelo zokusebenzisa amanzi kanengi-nengi ngemva kokuwahlanza, eze re-cycling.
Ukuze sizwe okunengi okuhlafunwe emhlanganweni lo, sixoxa loKhansila Khalazani Ndlovu ka Ward 10, ongumgcinisihlalo wekhomithi ebona ngenhlelo zamanzi ekhansilini yakoBulawayo.
Ukhansila Ndlovu uthi bakhangelele ukuxoxa ngaloludaba emhlanganweni we full council meeting, andubanabaluqhubele uhulumende, onguye okufanele avume ukuthi uhlelo lolu luqhubeke.
Uthi bakhangelele ukwenza lokhu ekupheleni kwayonale inyanga, njalo uhulumende engavuma, kungathatha inyanga eziyisitshiyangalombili ukuthi idamu leli lakhiwe.
Your browser doesn’t support HTML5
Ingxoxo loKhansila Khalazani Ndlovu