UMongameli Emmerson Mnangagwa ubhodabhode endaweni ezitshiyeneyo embukisweni wezamabhizimusi oweZimbabwe International Trade Fair (ZITF) koBulawayo ngoLwesihlanu wancoma impahla ehiqizwa ngamankampani eZimbabwe isithi ngeyezinga laphezulu.
Ubekhatshwe yiziphathamandla zeZITF, amadodana akhe angamawele uSean loCollins kanye losomabhizimusi odume ngokuthengela abasekeli beZanu PF izimota uMnu Wicknell Chivhayo.
President Emmerson Mnangagwa tours the ZITF
Wethekelele indawo ezitshiyeneyo lapho okubukisa khona amankampani aseZimbabwe lawakwamanye amazwe. Ekhuluma ngemva kokubhoda-bhoda uMnangagwa uthe uyathokoza ngamalungiselelo alumbukiso, wona ozavulwa ngoMgqibelo ngokusemthethweni nguMongameli Willian Ruto wakweleKenya.
ZITF 2024
"Ngiyasuthiseka ngengithe ngakubona lapha embukisweni walamuhla ngihlala ngisitsho ukuthi ilizwe lakhiwa ngabanikazi balo umbukiso walonyaka uyabukeka uma ngiwuqathanisa lomnyaka odlule."
Esuka eZITF uMnangagwa uhambe wayahlangabeza uMongameli Ruto egcekeni lendizamtshina eleJoshua Mqabuko Nkomo International Airport koBulawayo ekutshoneni kwelanga.
Kenyan President William Ruto arrives in Zimbabwe
Umgcinisihlalo weZITF uMnu Busisa Moyo, onguye obetshengisa uMnangagwa eTrade Fair, uthi kulamankampani edlula amakhulu ayisikhombisa lengxenye, 766 abukisayo lonyaka njalo aphezu kwekhulu - 115, ngavela kwamanye amazwe.
"Silamankamapani angu 766 abukisayo ayi litshumi lanhlanu ekhulwini ngabvela kwamanye amazwe kuthi angamatshumi amabili ekhulwini ngawalapha koBulawayo."
Omunye wababukisayo ngusomabhizimusi osakhulayo osekelwa nguhulumende weMelika eZimbabwe uNomazulu Mguni, obukisa izicathulo azithungayo, zona athi zimlethela inzuzo.
"Ngafundiswa ukuzisebenza yiDreams siisekelwa nguhulumende weMelika ngilapha nje ngibukisa umsebenzi wami wempahla ezehlukeneyo zesikhumba ngibonga lomtshina omutsha abangiphe wona."
ZITF 2024
Omunye njalo obukisayo, uNkosazana Lesta Jack, okubhizimusi lokupheka amafutha okugcoba uthi ulethemba lokuba umbukiso lo uzamupha ithuba lokuthengisa impahla yakhe njalo akhulise ibhizimusi lakhe.
"Ngilapha ngisekelwa yiZimtrade kodwa mina ngikubhizimusi lokupheka amafutha okugcoba umzima lenwele njalo ngisebenzisa ezemvelo akukho okunye engikufakayo okuyimithi yesilungu. Ngokuya kwasikathi ngikhangelele ukuyathengisela kwamanye amzwe."
UMnu David Gate obona ngezamabhizimusi lokuthengiselana emele uhulumende weUnited Kingdom eZimbabwe uthi nyakenye benza amabhizimusi adlula ingxenye yebhiliyoni eZimbabwe.
"Uhulumende weUK eZimbabwe ulamabhizimusi athile awenza labosomabhizimusi bakuleli labakwele UK njalo ngomnyaka ka2023 senza inzuso ekusilinganiso esedlula ingxenye yebhiliyoni ngakho yikho indikimba yethu yokubukisa lapha lonyaka ikhangele kakhulu ezamabhizimusi."
ZITF 2024
Amazwe aphetsheya abukisayo agoqela eleMelika, iBhilithani, China lamanye. Lapho okubukisa khona iMelika, umkhokheli wesigodlo salelilizwe eZimbabwe uElaine French utshone ekhuluma labantwana besikolo ebachasisela ngenhlelo zemfundo ezipha izizalwane zeZimbabwe ithuba lokuyafunda kweleMelika.
Umbukiso weZimbabwe International Trade Fair upha amankampani ithuba lokuthengiselana njalo owalonyaka uhamba phansi kwendikimba ethi "lnnovation: The Catalyst to Industrialisation and Trade.
ZITF 2024
Lumbukisa uza ngesikhathi umnotho weZimbabwe uqhubeka ugugudeka njalo uhulumende esanda kwethula imali entsha ebizwa ngokuthi yiZimbabwe Gold kumbe ZiG, okulinyathela elisolwa zingcitshi zezenotho zisithi ayisikho okungathuthukisa umnotho welizwe kumele kuguqulwe isimo sezombusazwe kanye lokuqeda udubo lwenkohlakalo kuqala.
Uhulumende yena ngakwelakhe icele uthi imigoqo edalwa yizijeziso zenotho azethulelwa ngamazwe angentshonalanga yikho okuphazamisa eyakhe imizamo yentuthuko.
Your browser doesn’t support HTML5
Udaba Siluphiwa nguAnnahstacia Ndlovu