Amalunga ebandla leMthwakazi Republic Party ayisithupha abotshwa etshengisela ngomnyaka ka 2021 eBulawayo Central Police Station esithi adinga umholi walelibandla uMnu. Mqondisi Moyo kuleyondawo akhululwe ngoLwesibili entolongweni ngemva kokupika kusukela ngoMabasa ngomnyaka ka 2022.
Abakhululiweyo babalisa oNkosazana Sibongile Banda loBusi Moyo abakade beseMlondolozi koBulawayo laboMnu. Nkosinathi Ncube, Ackim Ndebele, Tinos Nkomo, lo Liveson Ncube eHarare Central Prison.
Ilunga leMRP uMnu. Thembisani Mfulongashi Mpofu, ohlangabeze abakade bese jele yeHarare, utshele iStudio 7 ukuthi usebhasini esuka eHarare isiya koBulawayo ngoLwesibili ntambama labane laba belubhekise ekhaya.
Abaseleyo ngoMnu. Mongameli Xukuthwayo Mlotshwa lo Welcome Moyo abakhangelelwe ukukhululwa ngenyanga kaNhlangula loMnu. Maxwell Nkosi owetheswa elinye icala, ozakhululwa ngo 2026.
UMnu. Mpofu uthi abaseleyo laba bajabule ukubabona njalo babachasisela ukuthi isimo sokudla lendawo yokuhlala, silukhuni eHarare Central Prison okwedlula eseChikurubi, lapho abasuswa khona.
Sixoxe loNkosazana Banda obelubhekise ekhaya ukuze sizwe okwakusenzakala eMlondolozi.
Uthi balindele ukuchasiselwa ngabanye babo ngokuxabana okubikwa kuphakathi kwamalunga alelibandla andubana baphe owabo umbono ngalingxabangxoza.
Your browser doesn’t support HTML5
Ingxoxo loNkosazana Sibongile Banda