Kuqhamuke ukulwisana lokukuxokozela emngcwabeni ka muyi uNkosazana Moreblessing Ali owabulawa ngumsekeli we ZANU PF, uPius Jamba, abasekeli baka Mnu Nelson Chamisa bephoselana aqatha labaka Mnu. Job Sikhala emathuneni eZororo eChitungwiza. Isidumbu sika Ali besisemotshwari okweminyaka phose emibili.
Abalandeli baka Chamisa bebehlabela ingoma ezihaya umkhokheli wabo okucunule abasekeli baka Sikhala abathe abathule ngoba kusemfeni.
Kwasekuqhamuka udlakela, abantu batshayana ngezandla, kwaba yisimayemaye.
Amaqembu la ahluphane okwemizizuzu phose elitshumi andubana abanye babo babalamula baqhubeke ngomsebenzi abakade bewulandile, kodwa kulokufuthelana.
U-Chamisa yena kazange alugxobe.
Esethula amazwi akhe, uSikhala, othi usezasungula inhlanganiso yezombusazwe, uthe imfa ka Ali yisifundo sokuthi akumelanga abantu babulawe ngenxa yezombusazwe.
Ingcwethi kwezombusazwe zithi ukulwisana lokhu kuveza ukuba ibandla eliphikisayo liphakathi kobunzima obukhulu ngoba nxa abantu belwisana bodwa kuzaba nzima ukuba bakhiphe ibandla le ZANU PF embusweni.
Enye yalezi ngcwethi ngu Mnu Hebert Chamuka. U-Chamuka uthe kumele kube lokhulumisana phakathi kwenkokheli yebandla eliphikisayo.
Lokhu kusekelwe ngenye ingcwethi uMnu Liberty Sibindi osebenza lenhlanganiso ye Leaders for Africa Network.
Elinye ilunga le CCC uMnu Peter Ncube uthi kumele amalunga amabandla aphikisayo ahloniphe indawo ezifana lezimfa hatshi ukulwisana sikhathi sonke.
Ekhuluma emcwabeni ka Ali, uyise ka Ali uMnu Jimmy Ali uchaza umntanakhe njengo muntu owayethanda ezombusazwe esithi uyathaba ukuba umoya wakhe usuzaphumula.
Lokhu kwenzakala ngesikhathi inengi lisithi kulokungavumelani phakathi kuka Chamisa lo Sikhala, selokhe uSikhala waphuma ejele.
UChamisa yena osowahlamukela ibandla le CCC usolwa ngabasekeli baka Sikhala labanye abathi kayenzi konke okusemandleni akhe ukuzama ukulwisana le ZANU PF besithi wesaba ukubotshwa njengalokho okwenzakala kuSikhala.
Yena uthi ukubotshwa ayisikho okuveza ukuzimisela kwenkokheli yebandla eliphikisayo kodwa ukudinga usekelo olunengi ebantwini yikho okuqakathekileyo.
U-Jamba Mukandi, owabulala uNkosazana Ali wamcoba umzimba wawuphosela emgodini wamanzi omdala emzini kanina eNyatsime. Wagwetshwa ukuba avalelwe entilongweni okweminyaka angamatshumi amathathu – 30 years.
Your browser doesn’t support HTML5
Udaba Silethulelwa ngu-Mlondolozi Ndlovu.