Bathabe bamanzi te abaphatheke kumdlalo wokugijima edolobheni lakoBulawayo ngemva kokuba abapheki besinkwa abeBakers Inn belobelane isivumelwano lenhlanganiso yabaphathizikolo, eyeNational Association of Secondary School Heads (NASH) esokuba bazaxhasa izikolo zakoBulawayo kumncintiswano eyokugijima.
Umqeqetshi womdlalo wokugijima uThemba Mhlophe uthi umdlalo wokugijima usuzathuthuka kakhulu edolobheni lakoBulawayo ngemva kokuthola usekelo oluvela kwabeBakers Inn.
“Lolusekelo lutsho okunengi kakhulu emdlalweni wokugijima ngoba abantwabethu sebezaba lethemba labo elokuba bazathola okuthile nxa bengagijima kuma track events. Lokhu ngoba isikhathi esinengi kuma track events akutholwa lutho akufani lokugijima emgwaqweni kuma road events,” kutsho uMhlophe.
AbeBakers bathi bazancedisa abadlali ngokubagadisa besiya emidlalweni, babaphe isinkwa kanye lamanamunede, babaphe imvunulo abayigqoka nxa begijima, bababhadalele lapho abazabe behlala khona. Bathi njalo bazabapha imvuzo yemali kanye lesinkwa kulabo abazathola imendulo kumncintiswano abayabe bephatheke kuyo.
Obemele abadlali emkhosini wokuthakazelela lesisivumelwano uEsnath Ndlovu uveze ukuthaba okukhulu ngosekelo lolu.
“Ngizwa ngikhuthazeka kakhulu okokuthi nxa sesisiya eVictoria Falls sizafika sigijime kuhle sibuye lemendulo ezinengi. Sekungenzeka singabuyi lawo wonke konke siyathembisa ukuba sizabuya lawo ikakhulu awegolide. Usekelo lolu luzasifuqa ukuba lathi sigijime kakhulu ngoba sesisazi ukuba kulethuba elokuthi singagijima lapha singathola okuthile,” kutsho uNdlovu.
Lonyaka umncintiswano wenaNational Association of Secondary School Heads Athletics National Championships uzaqhutshelwa edolobheni leVictoria Falls njalo yikho lapho okuzahle kuqale khona uxhaso lwabeBakers Inn kuqembu elimele idolobho lakoBulawayo.
Umgcinisihlalo wenhlanganiso yeNASH edolobheni lakoBulawayo uBhekokuhle Dube ubonge kakhulu usekelo lolu njalo uthe isifiso sakhe ngesokuba baluthole lalapho sekudlalwa eminye imidlalo engasiyo eyokugijima.
Kusenjalo ilizwe leZimbabwe lizathumela abadlali abangamatshumi ayithoba minwe mbili lantathu (83) kumidlalo yeAfrican Games ezaqhutshelwa elizweni laseGhana kusukela mhla ziyithoba minwe mbili kusiya mhla zingamatshumi amabili lantathu kuyonale inyanga kaMabasa.
Iqembu elimela ilizwe leZimbabwe lizancintisa kumdlalo ebalisa owe athletics, cricket, cycling, triathlon, judo, rugby, karate kanye le-chess.
Your browser doesn’t support HTML5
Udaba Silethulelwa ngu-Joseph Njanji.