Abakhubazekileyo bathi yibo abahamba phambili kudubo lokuhlukunyezwa lokubandlululwa okukhulu ukwedlula abantu bonke abakunhlangothi ezitshiyeneyo zempilo. Bakhala njalo ngokuthi ilungelo labo kalinanzwa okwenza inengi labo lihlale likusigaba sobuyanga obesabekayo.
Ezinye zezinhlupho ababhekana lazo, abakhubazekileyo bathi yikungaqakathekiswa imibono yabo, ukubandlululwa, imigoqo ebenza benganelisi ukufinyelela imfundo, usizo lokwelatshwa, ukungaqhatshwa emisebenzini lokutshiywa phandle kwezinye inhlelo zokuziphilisa.
Osakhulayo uTariro Gurure okhubazekileyo ohlala koBulawayo, ulandisa ngezinye zezinhlupho ababhekana lazo.
“Into engingathi ikhangele kakhulu ukuvama okuyenza ukuthi siswele yikuthi asiqhatsheki, amankampani awafuni kusiqhatsha nxa ulobugoga njalo ungathi usungathi uthengise wena emsikeni kumbe esitradeni, imali yakhona iyabe ingayanelisi ukuthi ikugcine.”
Unkosazana Gurure uthi kodwa kungumlandu kahulumende ukubanakekela phansi kogatsha lwenhlalakahle kazulu ngezimali zesikhwama ese Social Welfare Social Grant.
“Asikayiboni imali layi ibuya ingena iphiwa abantu ukuthi begcinakale bekwanise ukuthi ukuthi bebhadale omastanda i-rent, bekwanise ukuthi behambise abantwana ezikolo. Singakhangela ukuthi ngeminyaka leyi emibili emithathu esisuke kiyo besilomkhuhlane oweCOVID, izinto zicine zintshintsha zaya phezulu kwezinga, i-tax isikhwelile.”
Ongathandanga ukuthatshwa amazwi umnumzana Brightom Musara waseHarare ngomunye wabasakhulayo osebenzisa ingqola njalo engokhubazekileyo uthi akazalwanga ekhubazekile kodwa kwabuya ngemva kokulimala kwakhe engozini yokuwela emthonjeni wamanzi. Yenake uthi waphazamiseka ezifundweni ngoba engasanelisanga ukuphutsha ugwalo luka-Form 4. Kunje uBrighton uthi uyehluleka ukuziphilisa esengogcinwa yizihlobo efisa ngabe uyatholiswa laye amathuba azenzele ukuze aphile laye impilo engcono.
USenator Annah Shiri okhubazekileyo omela abanye bakhe edale lephalamende uthi kuqakathekile ukuthi kulandelwe okumunyethwe yisisekelo sombuso welizwe ekulinganisweni kwamathuba lokungabandlululwa kwabo.
“Ukuthi ukulinganiswa kwamathuba, ukuthi abantu bonke balingene akulamuntu okumele abandlulule omunye umuntu ngomhlobo, ngolimi kumbe nge-disability.”
Emhlanganweni wamazwe omhlaba owe World Governments Summit osanda kuqhutshelwa eDubai, uMongameli Emmerson Mnangagwa utshele abakade bekhona ukuba eleZimbabwe lilizwe elizinikele ukunakekela izizalwane zalo zonke kungela otshiywa ngaphandle.
“Uhulumende weZimbabwe useqhube inhlelo ezimbalwa zentuthuko njalo engekho otshiywa ngaphandle selokhu uhulumende wesibili wangenayo embusweni ngomnyaka ka-2018”
Babalelwa kwabaphezu kwesigidi esisodwa (900 000-1.4 million) abantu abalokukhubazeka okuthile eZimbabwe. IZimbabwe iyingxenye yamazwe eyaloba isivumelwano sokulondolozwa kwamalungelo abantu abakhubazekileyo eseUN Convention on the Rights of Persons with Disabilities (UNCRPD).
Your browser doesn’t support HTML5
Udaba Silethulelwa nguMavis Gama.