Lokhu kuphume emhlanganweni owenziwa luhlangothi lukahulumende olubona ngezokuphekwa kwamagetsi olwe Energy and Power lamhlanje edolobheni le Victoria Falls.
Lumhlangano ubucubungula ngendlela ilizwe elingazithuthukisa ngayo ngezamagetsi ngesikhathi isimo sokuguquka komkhathi sisenza loludubo luqhubekele phambili.
Ongunobhala jikelele waloluhlangothi, uNkosikazi Gloria Magomba utshele lumhlangano ongenwe zingcitshi zakuleli lezaphandle kwelizwe ukuba isimo sokuguquka komkhathi sesiphazamise kakhulu ukweneliswa kwamagetsi kuleli. Uthi kunje amadamu agoqela eleKariba alamanzi amalutshwane kakhulu.
UMagomba uthi ngenhloso yabo, ilizwe kufuze ukuba lipheke amagetsi ayizigidi zenkulungwene eziyisithupha -6000 Megawatts, kodwa okwamanje banelisa ukupheka azinkulungwane ezimbilo lengxenye -2 500 Megawatts, osekuphazamise kakhulu abalimi.
“Sikhangelelane lempica enkulu kakhulu yendlala njengohlangothi. Abanye bathi indlala le ayikaze ibonakale, abanye besithi iza ngomfutho osebakayo, kodwa lokhu lokhu sekusiphazamisile emagetsini ngoba akulamanzi ngakho sizama imizamo yokubona ukuthi amagetsi singawapheka njani eKariba sisebenzisa ama battery lama solar.”
Inkulumo yakhe igcizelelwe njalo nguMnumzana Edward Kallon, obona ngezenhlelo ze United Nations eZimbabwe, eveza ukuba isimo sokuguquka komkhathi lesi siphazamisa kakhulu abesifazane labantwana.
“Inhlangothi ezibona ngezokwenjiswa, ezokulima, ezombukiso seziphazamisekile kakhulu, njalo lokhu sekubisele ilizwe emuva. Emaphandleni njalo, abasakhululayo, omama kanye labesintwana sebephazamisekile kakhulu ngalokhu.”
Emizameni yokuqondisa loluhlupho, uMagomba utshela lumhlangano ukuba uhlulumende usebumbe umthetho omutsha wokuthuthukisa ezokuphekwa kwamagetsi kanye lokuhuga osomabhizimisi kumazwe ngamazwe bangaba lesifiso sokubambisana labo.
“Umthetho uzabekwa ngokusemthethweni kunsukwana ezizayo, sisebenza sizabenzisana njalo labosomabhizimusi abazimelyo sipheme lendlela zokulonda esingakwenza ukuthola amagetsi sisebenzisa ezemvelo.”
Okwakhathesi eleZimbabwe lithola amagetsi amanengi emalahleni enjiwa kwele Hwange, avela edamu le Kariba kanye lehlekana elivela elangeni, kodwa uMagomba uthi sebesabalisa njalo ingqondo zabo ukuzama ukubona ukuthi indawo ezilempophoma zamanzi atshisayo ama hotsprings afana lawe Binga wona angezake epheke na amagetsi.
Izikhulumeli ezehlukeneyo zigqugquzele njalo kwelokuthi uhulumende kufuze abone ukuba intengo yamagetsi iyanfinyelelwa yizalwane zakuleli, beveza ukuba intengo yawo iphezulu.
Lumhlangono uzagqitshwa ngeLweSihlanu lapho okuzaphunywa lendlela ezinye njalo ezingenziwa ukuthukisa isimo sohlupho lwamagetsi ukuze ilizwe leli lithuthuke.
Your browser doesn’t support HTML5
Udaba Silethulelwa nguNokuthaba Dlamini.