Ukungani kuhle kwezulu lonyaka lokutshisa kwelanga okudlulisa amalawulo sokutshiye inengi lezakhamizi emaphandleni lingasela themba lokuthola isivuno ngoba izilimo sezitshile kulandela ukutshisa kwelanga okudlulise amalawulo.
Ngalokhu inengi lezakhamizi selilahle ithemba lokuvuna njalo kalisazihluphi ngokuya hlola emasimini. UNkosikazi Saziso Khumalo oyisakhamuzi seVokola eInsiza uthi isimo kasisihle emasimini.
“Okunengi sokutshile ikakhulu lowu umumbu obusubhacekile usufakele ingqamu, ungalayita umentshisi kubhebhe nje hayi indlala inkulu kakhulu vele nxa usithi uyakhangela ubone esambeni ungela ngitsho imali kutsho ukuthi vele icebo kalikho , impuphu layo intengo yakhona iphezulu okokuthi kuba nzima ukuthi uthenge impuphu enengi suphila ngokuthi yonaleyo imadlana oyabe uyitholile uthenge engeneli leviki.”
Lamazwi agcizelelwe nguMnu Gabriel Moyo oyisakhamuzi seMawane eGwanda South laye othi lonyaka indlala inkulu kakhulu.
“Amabele kutshile konke kutshile lonyaka abantu bayakufa ngendlala lezulu kalikho alini yona amanzi ezifuyo akula , amadamu secitshile ngoba kungaqhubeka kunje kusiyafika uJune akulamuntu ozasala lenkomo ngoba nyakenye zife kakhulu kwaze kwafa lamadonki okungcono yikuthi abantu bakhiphe lezi ezindala.”
UMnu Zwelithini Gabula oyisakhamuzi se-Sitezi eGwanda North uthi isimo esisemasimini sizwisa usizi. Ugcizelela ngokuthi kuyadingeka ukuthi uhulumende angenele asize uzulu ngokudla ukuze engabulawa yindlala.
“Kuqeda amandla lanxa uthi uyakhangela nje uzwa nje uphelelwa ngoba izulu alinanga kuhle , lithe ukuphuza ukuna labuya langani ngokufaneleyo abantu abazange baqeda ukulima ngakho ke ngeke sakhuluma ngesivuno ngenxa yokuthi vele abantu bebengaqedanga ukulima , phezu kokungaqedi ukulima khonalokho okuncinyane obekumilile sokuhlangana lembabazane yelanga imbawula ngokwayo isitshaya kwahle kwakhothama sokutshile.”
Ngenxa yokungani kuhle kwezulu, inengi lezakhamizi selivulele izifuyo emasimini, kutsho uNkosikazi Julieth Nkiwane oyisiphathamandla senhlanganiso emela amalungelo abomama lamantombazana eyeWomen Development Association of Zimbabwe.
“Abantu sesitshayisile emasimini ngibona nje bonke abantu sebesemagumeni sebesukile emasimini, abantu vele sebephakathi , eminyakeni ngalesisikhathi siyabe sesisidla amakhomani, sidobhadobha umumbu lamazambane akulalutho, njengotshani bona akulalutho sebutshile sobuwomile , indlala yalonyaka imbi izigaba zonke zemandebeleni ziyabongolela.”
Imizamo yokuxoxisana labogatsha lwezokulima iyehlule ngoba umqondisi wogatsha lwezokulima eZansi yemaNdebeleni uNkosikazi Shupikai Sibanda ethe sikhulume labakhulu bakhe esigodlweni eHarare abangaphendula imibuzo esibathumele yona.
Inhlanganiso yeWorld Food Programme encedisa uzulu ngokudla ithi abantu abafika phose izigidi ezintathu 2,7 million kuleli badinga ukuncediswa ngokudla.
Kusenjalo ugatsha lukahulumende olunakekela izifuyo olweVeterinary solubike ukuthi sekufe inkomo ezifika phose inkulungwane ezilitshumi lambili 12 000 selokhu kuqale umnyaka.
UMqondisi walolugatsha esabelweni seZansi yemaNdebeleni uMnu. Enart Mdlongwa uthi inkomo ezingu 11 980 sezibulewe ngumkhuhlane we January disease kusukela ngoZibandlela.
Your browser doesn’t support HTML5
Udaba Silethulelwa nguAlbert Ncube.