Inhlanganiso ezilwela amalungelo oluntu zithi umbiko owethulwe ngumsekeli kaMongameli welizwe, umnumzana Constantino Chiwenga esola uhlelo lokubhadalela indleko zezifundo olwe Munhu Munhu Scholarship, uphambana lesisekelo sombuso welizwe njalo ulobandlululo.
Lolu hlelo lwasungulwa ngabenhlanganiso yabantu abathandana ngobulili bunye, eye Gays and Lesbians of Zimbabwe (GALZ) ngenhloso yokuphathisa abakuloluhlangothi.
Embikweni wakhe lo, uChiwenga uthi akula kolitshi elizavumela ukuba uhlelo lokufundiswa kwabantu laba kuqhubekele phambili esithi ukuthandana kwabo akuvunyezwa ngokholo lwesiKristu, ngoba ele Zimbabwe lilandela ukholo lolu.
Lokhu kusolwa ngabakunhlanganiso eziqhuqhuzela ukulondolozwa kwelungelo loluntu besithi akukho kusisekelo sombuso.
Isiphathamandla senhlanganiso yeZimbabwe NGO Forum, uMnu Wilbert Madinde uthi yikuphosisa ukuthi ele Zimbabwe lilzwe lama Kritsu kuphela esithi isisekelo sombuso sinekeza wonke umuntu amalungelo oluntu.
"Isisekelo sombuso welizwe sinikeza wonke umuntu amalungelo ikakhulu kundaba zemfundo. Silandela lokho okukusisekelo sombuso hatshi abakutshoyo bona ngamazwi abo"
Kodwa abokholo lwesi Kritsu bathi basekele uChiwenga besithi umbhalo awubavumeli ukuthi abantu bathandane ngobubili bunye. Lokhu kutshiwo ngu Mfundisi Simbarashe Maringosi esithi bayazisola inhlelo zonke zabantu laba.
"Ilizwi leNkosi kalikuvumeli ukuthandana kwabantu laba. Lathi kasikuvumeli konke lokhu ngoba siholwa yiNkosi"
Isiphathamandla senhlanganiso yeGays and Lesbians of Zimbabwe, uMnu Chesterfield Samba utshele iStudio 7 ukuba kabakakhululeki ukupha umbono wabo njengenhlanganiso.
"Kangikavunyelwa ukukhuluma ngodaba lolu. Angikaphiwa imvumo"
UNkosikazi Gumisayi Bonzo okhokhela inhlanganiso ye Trans Smart Trust laye uthi bayesaba ukupha umbono wabo phezu kodaba lolu.
Uhulumende weZimbabwe kusukela ngesikhathi sika muyi uMnu Robert Mugabe wayevele ehlala ebathuka abakuhlangothi lwempilo yokuthakuthandana kwabantu bobubili bunye ebafanisa lezinja lengulube.
Imithetho yeZimbabwe kayicaci ngokuphila kwabantu abathandana ngobulili bunye kodwa kayivumeli ukuthsdiswa kwabo emithethwandaba loba emacaweni.
Uhlelo lwe Munhu Munhu Scholarship, olokubhadalela indleko yezifundo, indawo zokuhlala emakolitshini lakumaUniversity, lwaqala ngomnyaka ka2019.
SEE ALSO: Udaba Lokusolwa Kombiko Womsekeli KaMongameli silwethulelwa nguMlondolozi Ndlovu.