Sezihlalela evalweni izakhamizi ezihlezi emapulazini esabelweni esingeZansi yeMandebeleni kulandela ukusungulwa komkhankaso kahulumende, oqutshwa elizweni lonke, wokususa bonke abazihlalisayo emapulazini la. NgoLwesithathu amapholisa abophe izakhamizi zeNyandeni ezifika phose amakhulu amabili zisetheswa umlandu wokuzabela umhlabathi okungekho emthethweni.
Ababotshiweyo laba bagoqela izalukazi lamaxhegu, ontanga kanye labomama abakade belengane ezimunyayo.
Omunye walabo abetheswa umlandu wokuzihlalisa emaplazini okungekho emthethweni nguNkosikazi Sibusisiwe Moyo obotshwe Ngolwesithathu othi babotshwe lapho bebizwe emhlanganweni.
Nyandeni evicted villagers
"Basithethe ngesitsotsi emakhaya besithi sibuye emhlanganweni, safika lathi sizilungiselele ukuthi umhlangano ukuvillage khonapha, angiphathanga lutho, angiphathanga cent ngingazilungiselelanga ukuthi ngiyalala khona ngitshiya abantwana beyibo bodwa ngingela muntu ozasala ebalungiselela ukudla sibuya ngapha, njengami ngingumuntu amaphilisi ngilamalanga amabili nginganathi okutsho ukuthi sokuyikufa kwami."
Uphinde wathi nxa bengasuswa kulindawo akakwazi ukuthi uyophephelaphi.
"Kathesi lanxa besithi sisuke lapho sihlezi khona kubuhlungu, yebo ngumthetho kodwa siyasuka siyengaphi, sithembele ukuthi nxa singaphatheka kubi siye emthethweni kodwa umthetho yiyo osusiphatha kubi, kathesi omama bonke laba abanye balamalanga amathathu abawazi amanzi, akulamanzi okunatha lokugeza, akula kudla sibuye singela scent okuthi sithenge ukudla. "
Nyandeni evicted villagers
UMnu. Edfill Moyo uthi uzalelwe eNyandeni njalo wakhulela khona ngakhoke akula lapho angaqonda khona nxa engasuswa ngamandla kulindawo.
"Saphuma emzini omkhulu kuyikuthi sesibanengi emakhaya sayahlala eceleni kwabadala kodwa lathi silandela ilayini yabadala, kuyasizwisa ubuhlungu ngoba isikhathi sonke lesi bebesibhala singabantu bakhona thina esangena kuqala saze saphiwa lamakhadi ekhansilini, kathesi amakhadi lawana kwathwa singasawatheli."
Lamazwi agcizelelwe nguMnu. Throlip Nkala othi umhlabathi bawuphiwa yiziphathamandla zikahulumende.
"Enyandeni ngihlale ngo1982 mina bengisahlala ngaphansi komzali wami, kuthe ngo2008 sakhulumisana loresettlement officer lokhansila uChademana sacela ukuthi basilungisele indawo yokuhlola, basiphegela indawo yokuhlahla bathi singancengisa ngaphansi kwabazali bethu, yindawo esakhulela kiyo, abazali bami babhubhele la, bangcatshwa la, bengingafisi ukusuka la"
UMnu. Qiniso Ndlovu ongomunye wabazalelwa eNyandeni wakhulela khona uthi yena watshayelwa ihlahla ngemva kokufaka isicelo kuSobhuku.
"Ngahamba ngayacela indawo kuSobhuku, ngabizelwa umhlangano ngahlalelwa phansi abazali bonke bavuma ukuthi ngithole indawo.Sengiyitholile ngaqala lami ukwakha, mina ngangizitshela ukuthi kusemthethweni ngoba ngangifakwa yisandla sikahulumende esinguSobhuku, isambuzi senkambeni besisivumela ukulahla amanzi kuphela ukuthi uyengaphandle bekungavumi izambuzi zikhiyiwe."
Amapholisa elizweni lonke jikelele esebenzelana labogatsha olubona ngomhlabathi basungule umkhankaso wokubopha uzulu ozihlalise okungekho emthethweni emapulazini abawubiza ngokuthi ”Operation No to Land Barons”.
Izakhamizi zeNyandeni ezifika phose amakhulu amabili 180 ezibotshwe kusukela Ngolwesithathu zizamiswa phambi komthethwandaba ngemva kwamaviki amabili. Ayisizo zodwa izakhamizi zeNyandeni ezibotshwe zasiwa emithethwandaba phansi kwalolu hlelo ngoba solusabalele ilizwe lonke okugoqela iMasvingo, Manicaland lezinye.
Ingcwethi ezicubungula ezenhlalakahle kazulu lezemithetho ziyalusola kakhulu uhlelo lolu zisithi inengi lalaba bantu latshiywa ngabamhlophe abaxotshwa emapulazini la njalo abanye babo babelwa lumhlabathi ngabezombusazwe bekhankasela ukuthola usekelo lokuvotelwa. Lezi ngcwethi zikhuthaza uhulumende ukuthi abadingele ezinye indawo zokuyakwakhela khona lokubaxotshela iganga njengabanye babo abazalelwa bakhulela kulezi ndawo batshiywa ngabazali abangazi lokuthi bayaqondaphi nxa sokunje.
Your browser doesn’t support HTML5
Udaba lokuxotshwa kwabazihlalisa kutsha siluphiwa nguAlbert Ncube