Owake waba ngummeli weZengeza West edale lePhalamende uMnu Job Sikhala uthi usephumile kubandla leCCC njalo uthi usesungula inhlanganiso yezombusazwe entsha ezaqakathekisa izifiso zikazulu futhi ezakhankasa ngamandla ukuze ibandla leZanu PF likhutshwe embusweni.
Ekhuluma lentathelizindaba eseHarare, uSikhala, okhululwe ejele kunsukwana ezedluleyo ngemva kokuvalelwa okweminyaka phose emibili, uthe inhlanganiso le ayisilobandla lezombusazwe kodwa ngumanyano wabantu abavela kunhlangothi ezitshiyeneyo zempilo ojonge ukugqugquzela ukususwa kwebandla leZanu PF embusweni ukuze kungene uhulumende oqakathekisa intando kazulu.
USikhala uthe ekuqhubeni lumzabalazo, uzalalele imibono kazulu njengalokho okwenzakala ngesikhathi kubunjwa ibandla leMDC ngomnyaka ka 1999.
“Asikho lapha ukutsho ukuba kuzakuba lebandla lombusazwe elitsha kodwa iqula lethu elizalwela umbuso wentando kazulu sisenzela uzulu wonke we Zimbabwe’’
USikhala walile ukutsho ukuba inhlanganiso le izabizwa ithiwani kodwa uthe bazaphuma ijumo besiya ebantiwni phansi kohlelo abalubiza ngokuthi yiDemocrati Consultative Convention besiyakhulumisana labatsha, abafundi, abaphila ngokuthengisa, abalwa impi yenkululeko lozulu nje jikelele bebonisana ukuthi bangawuquhba njani umzabalazo wokukhipha uMongameli Emmerson Mnangagwa leZanu PF yakhe embusweni.
UMnu Sikhala ufisele inhlanhla labo abafuna ukuqhubeka bephansi kwebandla leCCC, lona athi seliyisidumbu, kodwa kazange atsho ukuba uzasebenza yini loMnu Nelson Chamisa osanda kukhalala lelibandla esithi selangenwa zimpehlane.
Abanye abacubungula ezombusazwe bathi kuzabanzima ukuba uSikhala asebenze yedwa engela Chamisa, yena abathi uthandwa ngabantu abanengi.
Omunye wabahlaziyi laba nguMnu Kudakwashe Zulu yena othi kumele uSikhala abambane labanye.
“USikhala kasoze akwenelise lokhu asekwezile. Uzithi ulabantu kanti hayi. Uzenzela okwakhe. Akula azakuya khona yikho ukuphela kwakhe lokhu bekumele azibuthe abe ngumuntu’’
Kodwa uMnu Herbert Chamuka owebandla lePeople’s Unity Party uthi uSikhala wenza kuhle ngoba efuna ukuqala indlela entsha yokulwisana leZanu PF.
“IZANU PF yayisithi ukufaka uSikhala ejele yikumqeda amanga. USikhala waba lesikhathi eside sokuthi angakhulula njani abantwana be Zimbabwe. Siyamsekela ukuba asebenze ngendlela ka Tsvangirai’'
Isikhulumeli selinye lamacele eCCC, uMnu Promise Mkhwananzi utshele iStudio 7 ukuthi uSikhala kumele aphumule lemuli yakhe njengomuntu esanda kuvela ejele.
Kodwa owaxotshwa ePhalamende elilunga leCCC okhokhela inhlanganiso yeVeteran Activists Association of Zimbabwe uMnu Felix Mafa uthe akasekeli okwenziwa nguSikhala.
“Savela sakubona ukuba uSikhala sebemsebenzile ingqondozakhe ejele. Bamfuze ngamazwi angasiyo. Uthe ephuma wasola abantu bonke kakhulu ibandla lakhe. Akwenzayo lakutshoyo kuveza ukuba watshelwa amanga’’
Kodwa uMnu Mabutho Moyo olunga leZanu PF Central Committee, uthi uSikhala, njengabo bonke abaphikisayo kasoze enelise ukumelana lebandla elibusayo.
“Siyamuzwa uSikhala. Ukuphikisana le ZANU PF yikuphisana labantu. Kasoze anqobe lutho. Lilungelo lakhe kodwa asuye wakuqala. Ibandla le ZANU PF libandla labantu’’
Emhlanganweni wanamhlanje uSikhala ubephahlwe ngabasekeli bakhe abathi uMnu Comfort Mpofu owenhlanganiso yeJob Sikhala Solidarity Movement lomkhokheli webandla leDemocratic Party uMnu Urayayi Zembe.
Abanye abakade besemhlanganweni lo bagoqela abezigodlo zabameli bamazwe abalisa iCanada, Sweden leNetherlands, eZimbabwe kanye lowake wabangumgcinisihlalo weMDC, uMnu Morgan Komichi.
USikhala wabotshwa ngomnyaka ka2022, eChitungwiza wetheswa icala lokutshotshozela udlakela eNyatsime, lapho akhuluma khona kulandela ukubulawa kwelunga leCCC uNkosazana Moreblessing Ali.
Wancitshwa ithuba lokukhululwa ngebail okweminyaka phose emibili, 1 year, 7 months, waze wakhululwa kunsukwana ezedluleyo ngemva kokuba umantshi ebeke eceleni isigwebo sakhe kulandela ukudliwa kwakhe licala.
Izolo utholakale elelinye njalo icala lokuqamba amanga enkundleni yeFacebook njalo uzagwetshwa ngpMvulo kuviki ezayo.
Your browser doesn’t support HTML5
Udaba lokaSikhala lokusungula imovement siluphiwa nguMlondolozi Ndlovu