Idale labaphathintambo baka hulumende eleCabinet lazise, Ngolwesibili, ukuba ele Zimbabwe selihlela ukuba lomthetho ozamisa isigwebo sokulengiswa komuntu othalakala elecala, eseDeath Penalty.
Abenhlanganiso elwela amalungelo oluntu emhlabeni jikelele eye Amnesty International, bamukele ngenjabulo isinqumo esithethwe nguhulumende we Zimbabwe lesi.
IAmnesty International ithi lesi sigwebo sephula amalungelo oluntu njalo senziwa ngochuku olukhulu okumele sikhitshwe emthethweni emazweni wonke womhlaba.
Ekhuluma lentathelizindaba ngemva komhlangano lenthathelizindaba e Harare obona ngomsebenzi wenhlanganiso le, e Zimbabwe, uNkosikazi Nokholo Matshazi uthe bayamukela ngenjabulo isinqumo sikahulumende.
UNkosikazi Nokholo Matshazi of Amnesty International
“Sikubona kuyinto enhle, sifuna abantu bagwetshelwe ukuhlala entolongweni. Ijele yindlela yikulungisa indlela umuntu aphilisana layo labanye hatshi ukuba agwetshelwe ukufa. Sifuna ukuba umthetho lo ukhitshwe."
UNkosikazi Matshazi uqhubeke ethi emhlabeni wonke jikelele amazwe aqhubeka esesula umthetho wesigwebo sokulengisa.
“Ukugwebela umuntu ukufa akupholisi isilonda salowo oyabe eyenzelwe okubi. Ukubulala umuntu kwenza engatholi ithuba lokuba azilungise njani. Amazwe onke asewukhipha lumthetho’’
Umphathintambo kahulumende obona ngokwethulwa kwemibiko uMnu Jenfan Muswere uthi uhulumende ukubone kufane ukuba esule lesi sigwebo.
“Sifuna ukuwukhipha lumthetho silandela iziqondiso zalokho okuphume kudale labaphathintambo. Umthetho lo kumele uqondiswe’’
Umthetho lo uzasiwa edale lephalamende kunyanga ezilandelayo, okutsho ukuba ungavunyelanwa edale leli, ele Zimbabwe lizakuba ngelinye lamazwe aphezu kwekhulu-110 ase khiphe lumthetho emhlabeni jikelele.
Ele Zimbabwe okwamanje lilabantu abangamatshumi ayisithupha lantathu – 63 asebagwetshelwa ukulengiswa kodwa ele Zimbabwe lacina ukulengisa izibotshwa ezilalesi sigwebo ngomnyaka ka2005.
Abantu abavunyelwa ngumthetho we Zimbabwe ukuba bagwetshelwe ukufa bagoqela abesilisa abaleminyaka engamatshumi amabili lanye-21 kanye lalabo abangakafiki iminyaka engamatshumi lasikhombisa- 70. Abesifazana kabaphiwa isigwebo lesi.
Your browser doesn’t support HTML5
Udaba lokwesulwa kwesigwebo sokulengiswa siluphiwa nguMlondolozi Ndlovu