Obengumkhokheli weCCC, osanda kutshiya lesi sikhundla ngemva kokukhalala ibandla lakhe, uMnu Nelson Chamisa uthakazelele iminyaka yakhe yokuzalwa engamatshumi amane lasithupha, 46, Ngolwesihlanu ethembisa uzulu ukuthi uzaphenduka kwezombusazwe aqhubeke ngomzabalazo wokukhipha iZanu PF embusweni ukuze athuthukise impilo kazulu.
Ekhuluma lentathelizindaba zeStudio 7 ehofisini yakhe eHarare uChamisa uthe ukutshiya kwakhe isikhundla sokukhokhela iCCC kumnikeze ithuba lokuthi acabangisise ngekusasa lakhe njalo alungiselele ukuphindela kwezombusazwe eselomhlahlandlela ocacileyo okumele awulandele ukuze akhiphe uhulumende weZanu PF.
UChamisa, yena okhalale ibandla lakhe waphuma kulo ngeviki edluleyo esithi selingenwe zimpehlane zeZanu PF, uthe abantu kumele bambekezelele, esithi isikhathi sokuthi athathe umbuso kuMongameli Emmerson Mnangagwa leZanu PF sesisondele.
Uthe yena uthembele kuNkululunkulu hatshi lokho akutshelwa ngabantu. Ebuzwa yiStudio 7 ukuthi uzakwazisa abantu nini ngalokho azakwenza loba ukusungula ibandla elitsha, uChamisa kathandanga ukuphumela egcekeni.
Abahlaziya ezombusazwe bathi kuzaba nzima ukuba uChamisa asungule ibandla elingcono kuleleCCC ngoba ukhanya engubaba ohlala ebaleka etshiya abantwana bodwa kungangena inyoka ngekhaya nanku wabalekela iMDC Alliance esesiyabumba iCCC, yona aseyikhalele njalo ngemva kokuyihluthunelwa nguMnu Sengezo Tshabangu.
Omuye wabalombono lo nguMnu Teddy Ncube, osebenza lenhlanganiso yeLeaders for Africa Network.
Amazwi kancube asekelwe nguMnu Bekezela Gumbo owenhlanganiso yeZimbabwe Democracy Institute.
Kodwa omunye njalo ocubungula ezombusazwe uMnu Melusi Dube, owenhlanganiso yeInstitute of Democracy uthi uChamisa usethole izifundo ezinengi selokhe eqale ezombusazwe, ngakho uthi ulakho ukwenza ngcono engabumba ibandla elitsha.
Kulehungahunga lokuthi uMnu Chamisa uzasungula ibandla elitsha elizaba lombala oluhlaza okwesibhakabhaka kulandela ukuconjwa kwamahofisi eCCC ngalumbala ngabasekeli bakhe koBulawayo.
Kodwa yena walile ukukhuluma ngokuthi uzasebenzisa lumbala yini engabumba ibandla elitsha kumbe hatshi lanxa nje ebegqoke iyembe lombala lo ekhuluma lenthathelizindaba.