Umthethwandaba wamazwe omhlaba oweInternational Court of Justice unqume Ngolwesihlanu, ukuba eleIsrael kumele lithathe amanyathelo aqinileyo awokwenqabela umbhuqazwe wokubulawa mahlayana kwabantu makhaza libutho lalo esihlengeni seGaza, kwelePalestine, lapho elilwisana khona leqembu leHamas.
EleIsrael lamangalelwa nguhulumende wakweleSouth Africa, yena owacela umthethwandaba oweUnited Nations le ukuthi umise ukuhlasela kweIsrael eGaza.
Isinqumo saNgolwesihlanu samukelwe ngenjabulo ngabanengi emhlabeni jikelele okugoqela izizalwane zeZimbabwe lezakweleSouth Africa.
Umthethwandaba weICJ unqume njalo ukuthi eleIsrael kumele limise ukuhlukunyezwa kwabantu beGaza noma ngayiphi indlela ebathinta enyameni kumbe emoyeni.
World Court rules on Gaza emergency measures in Israel genocide case, in The Hague
EleIsrael lilaywe njalo ukuba kumele libone ukuthi usizo lokudla lolunye uncedo oluphuthumayo luyabafinyelela abantu bakwelePalestine abahlaselwe yindlala emangalisayo ngenxa yempi eqhubekayo phakathi kweIsrael leHamas.
I-ICJ ithe njalo eleISrael kumele lijezise amabutho alo nxa ethe adala amacala ombhuqazwe abulala abantu makhaza ngobunengi, i-genocide. Umahluli ulaye eleISrael ukuthi lazise linkantolo ngemva kwenyanga ukuthi liyabe selithethe waphi amanyathelo ezinqumo azethule Ngolwesihlanu.
Izizalwane zakweleSouth Afrioca lezeZimbabwe zamukele isinqumo lesi ngenjabulo. Nangu umngcinisihlalo wenhlanganiso yeZimbabwe Community in South Africa uMnu Ngqabutho Mabhena.
“Ihlombe iSouth Africa ngokuthi ihambise uhulumeni waseIsrael enkantolo enkulu eyomhlaba. Izinto ezaphakanyiswa nguhulumende weSouth Africa inkantolo enkulu yomhlaba ivumelane lazo.”
Abanye bathi kuyadingeka mpela ukuthi eleIsrael livinjwe yinkantolo yomhlaba ukuqhubeka lihlasela eGaza ngoba ukwekelwa kwezenzo ezinje kuyikho okwabangela ukufa kwezinkulungwane zabantu eZimbabwe ezigabeni zeMatabeleland laseMidlands ngesikhathi sombuqazwe weGukurahundi.
Zimbabwean Journalist- Mxolisi Ncube
Esinye isizalwane seZimbabwe njalo eyintatheli uMxolisi Ncube uthi lobanje iZimbabwe ibhekane lezayo inhlupho kufanele abantu bakujabulele ukuphepha kwabanye.
“Into eyenzakala lapho kufanele ukuthi lathi singamaZimbabweans langxa siphakathi kwenkinga engakanani kwezombusazwe sizwelane labantu basePalestine ngoba kuyafiwa and kufa kakhulu abantu abangasimasotsha amacivilians befela into abangayithandiyo bona. Angicabangi ukuthi abantu basePalestine bayayithanda iHamas.”
Esinye njalo isizalwane seZimbabwe esihlala kweleSouth Africa uMnu Davison Mbambo laye uthi basemukela ngezandla zombili lesisinqumo ngoba sivikela impilo zabantu.
“Ngiyasemukela isigwebo esethulwe yi ICJ ngoba kuzenza ukuthi abantu be Israel bame ukubulala abantu. Kuzosiza futhi ukuthi abantu basePalestine bangalambi. Ngoba ukuhlaselwa kwabasepalestine bekuphambanisa yonke into. Abantu bayagula, abantu bayalamba abantu bayafa.”
Mrs Karen Milner- Chairperson of the South African Jewish Board of Deputies
Umgcinisihlalo wenhlanganiso yeJewish Board of Deputies unkosikazi Karen Milner uthi lobanje bengavumelani lendlela iSouth Africa ephathe ngayo loludaba, kukhona okubathokozisayo kuleli sigwebo.
Sithokozela ukuthi umthethwandaba kawutshongo ukuthi kubekwe phansi izikhali njengobekufunwa yiSouth Africa lokuthi uthe abathunjwa yiHamas abakhululwe.
Umthetho wenkantolo yeICJ uyaphoqa eleIsrael ukuthi lilandele izinqumo zanamuhla, kodwa akulandlela ecacileyo lelilizwe elingabanjwa ngayo ngamandla ukuthi lihloniphe lezizinqumo nxa lingafuni.
UMongameli weleSouth Africa uMnu Cyril Ramaphosa wethule umbiko kumabonakude ekhuthaza eleIsrael ukuthi lizihloniphe izinqumo lezi njalo lizilandele ngokugcweleyo.
Inhloko kahulumende weleIsrael uMnu Benjamin Netanyahu yena uthe bazaqhubeka bevikela ilizwe labo ekuhlaselweni yiHamas, okuliqembu elihlelwe yiMelika njengeledlulise amalawulo, futhi uthi akusiloqiniso ukuthi benza umbhuqazwe eGaza. Uthe uyakwamukela njalo ukuthi inkantolo le ayitshongo ukuthi ilizwe lakhe kumele limise limpi.
Your browser doesn’t support HTML5
Udaba Esilwethulelwa NguThuso Khumalo.