Umthethwandaba waphezulu oweHigh Court wethule isinqumo unikeza ozithi ungunobhala jikelele we CCC, uMnu Sengezo Tshabangu imvumo yokuba avimbe amalunga edale lephalamande lamakhansila angamatshumi amabili lantathu-23 ukuphatheka kukhetho lwama by-election olwenziwa ngenyanga ezayo kaNhlolanja mhlaka 3.
Esethula isinqumo sakhe uMahluli Pisirayi Kwenda uthe okwenzakala kubandla le CCC yikulwisana kwamaxuku alembono ehlukeneyo awebandla linye amacele womabili kumele abe lendlela zokulungisisa ukudonselana okukhona.
Uthe ukuxotshwa kwamalunga awe CCC okwenziwa ngu Tshabangu kwakusemthethweni okwenza ukuba ukubavimbela kwabo kube yinto esemthethweni ngoba elamandla okwenza lokhu.
Igqwetha lika Tshabangu uMnu Nqobile Sithole bayamukela ngenjabulo okuphume emthethwandaba echasisa okwenzakele namhlanje.
‘’UMahluleli namhlanje utsho kwaba sobala ukuba kabenelisi ukuyangena kukhetho besebenzisa ibizo le CCC ngoba uTshabangu enguye yedwa olamandla okuxotsha abantu kubandla leli’’
Kodwa obona ngo msebenzi wokhetho kuCCC, uNkosikazi Ellen Shiriyedenga uthi kuyamangalisa ukuba uTshabangu unqobe njani emthethwandaba bona bengamazi vele ebandleni.
‘’Sidane kakhulu ngalokhu osekuphume emthethwandaba ngoba siyakwazi ukuba thina sasebenza nzima siding usekelo kodwa abantu esingabaziyo sebethethe ibandla lethu’ besixotsha thina sivele singabazi"
Uqhubeke esithi ibandla leli lizazama ngazo zonke indlela ukulandela umthetho okungagoqela ukuphikisa lesi sinqumo edale laphezulu.
‘’Sizaqhubeka sikulwisa lokhu njalo sizahlala phansi sibone ukuba nxa kuhambeka emadale aphezulu siyekhona’’
Ingcitshi kwezombusazwe esebenza lenhlanganiso ye Zimbabwe Revoluntionary Institute uMnu Tjenesani Ntungakwa uthi kusobala ukuba ibandla le CCC liqhubeka lisenza iphutha elifanayo kumele lidinge amanhye amacebo okumelana lalolu dubo.
‘’Kakumelanga baqhubeke besiya emithethwandaba ngoba kuvele kusobala ukuba akula okuzaphuma ema courts. Sokumele bedinge ezinye indlela ukuze ibandla labo liqine njalo lingathathwa ngabanye abantu’’
Okuphume emthethwendaba namhlanje kutsho ukuba ibandla le ZANU PF selizaphatheka kukhetho lingela abaphikisana lalo.
Lokhu ngokwesibili umthethwandaba waphezulu usamukela isicelo sika Tshabangu esokuvimba labo abaxotshisayo ephalamende ukuncintisa kukhetho.
Umthethwendaba uvimbe amalunga awe CCC ayisitshiyagalolunye-9 ukuncintisa kukhetho ngo Mpalakazi.
UTshabangu usexotshise amalunga ephalamende edlula amatshumi amathathu lamakhansila angamatshumi ayisikhombisa-60 elizweni lonke.
Kodwa umkhokheli weCCC uMnu. Nelson Chamisa uhlala ekusola okwenziwa nguTshabangu ethi akukho emthethweni ngoba engasilo lalunga lebandla lakhe.
Kunje uChamisa lebandla lakhe balodaba olusemthethwandaba owe High Court lokuphikisa konke okwenziwa nguTshabangu besithi kabamazi ukuthi ukwenza njengobani ngoba bengelaso lesikhundla sikanobhala jikelele.
Your browser doesn’t support HTML5
Udaba lweCCC esilwethulelwa nguMlondolozi Ndlovu.