Abalandeli bomdlalo wenguqu bathi abazi kuyozalwa nkomoni ekupheleni kwemidlalo eyokudinga intshantshu yezwekazi leAfrica emdlalweni wenguqu, eyeAfrica Cup of Nations, yona eqala namhla elizweni laseIvory Coast.
Umdlalo wakuqala owomncintiswano we2023 Africa Cup of Nations ukhona namhla ntambama njalo uxega iqembu elimela ilizwe eliqoqe limidlalo ele-Ivory Coast kanye lele-Guinea Bissau.
Lawa maqembu akusibaya sikaGroup A ndawonye leNigeria kanye leEquatorial Guinea.
Kulezibaya eziyisithupha ezibunjwa ngamaqembu amane ngasibaya sinye.
Umlandeli womdlalo wenguqu ohlala elokitshini le-Luveve uMusa Moyo uthi ukuba khona kwamaqembu angamatshumi amabili lane (24) ancintisa ukuphakamisa inkezo kupha ithuba amaqembu amela amazwe angela ndumela enkulu emdlalweni wenguqu.
“Ngibona ukuthi amanye amaqembu lawa angakhangelelwanga ngabanengi lawo lonyaka azayenelisa ukudlala ethole impumela enhle ngoba umdlalo wenguqu usutshintshile kulezinsuku.
Akulandaba ukuthi abanye badlala phetsheya kuboNgilandi kumbe ngaphi.
Kutsho ukuba sizabukela imidlalo elokuncintisana okukhulu njalo sizakholisa. Sebengangena laboTanzania bonalabo bayephambili, singabi silokhu silandelana laboSenegal sikhangelele o(Sadio) Mane kodwa sikhangelele okunye okungabafana okutsha.”
Ngakwelinye icele uBhekimpilo Ngwenya, odlala kusigaba sikaDivision Two edolobheni lakoBulawayo, uthi yena abadlali abadlala phetsheya kolwandle yibo akhangelele kubo.
“Siyabe sikhangelele ukuba njengoba kuyabe kulabadlali abakhulu abasuka emazweni imidlalo yeAfcon izachaza. Sizakhumbula njalo ukuba emidlalweni eyadlulayo uMane nguye owaphakamisa inkezo yikho khathesi sikhangelele ukuthi u(Mohamed) Salah laye uzayiphakamisa. Uvele ukungabi khona kwakhe kuqembu leLiverpool kulezinsuku kuyasiphazamisa yikho kumele ahambele into ekhanyayo asenzele kuhle.”
Umhlubulo wangezansi yezwekwazi leAfrica umelwe ngamaqembu abalisa eleSouth Africa, Zambia, Mozambique, Angola kanye leNamibia njalo owayeyintatheli yezemidlalo osesebenzela iqembu leBulawayo City uThandiwe Moyo uthi uyakholwa ukuba phakathi kwawo lawamazwe kukhona elingenza izimanga.
“Lonyaka sikhangelele ukuthi iAfcon izabe ichaza kakhulu ngoba silamaqembu amanengi avela kulumhlubulo wezwekazi afana laboZambia leSouth Africa aseke anqoba kuzwekazi laseAfrica.
Ungakhangela iqembu leSouth Africa lilabadlali abanengi abaphuma kuqembu leMamelodi Sundowns lona eseliqhube kuhle kuzwekazi leAfrica.
IZambia isike yayiphakamisa inkezo yeAfcon phambilini njalo ngithemba ukuba abantu abanengi lapha kweleZimbabwe bakhangelele kuwo womabili lawa amaqembu.
Khona nje lonyaka kuthembisa ukuba umncintiswano wakhona uzachaza kakhulu.”
Odlalela iqembu labasakhulayo eleHighlanders uDaniel Madondo laye uthi ukhangelele ukuba iqembu leSouth Africa liqhube kuhle.
“Ilizwe leSouth Africa ngomakhelwane bethu njalo siyabukela imidlalo yabo. Ngithemba singakhangelela kubo ngoba balabadlali abalaziyo ibhola ababalisa uThemba Zwane kanye lo Lorch, uThembinkosi Lorch. Ngabadlali abalaziyo njalo bengaphathisa iqembu leli ukuba lifinyelele kude.”
UNqobani Ngwenya, laye oke wadlalela iqembu labasakhulayo eleHighlanders, uthi yena ukholelwa ukuba intshantshu zizaphuma kumaqembu alabadlali abanengi abadlala phetsheya kolwandle.
“Mina amaqembu engiwalandelayo yiSenegal kanye leCameroon wona esiwaziyo ukuba alabadlali abanengi abadlala emazweni, awafana laboSouth Africa abalabadlali abadlala kibo. Ngale kuboCameroon abadlali bakhona abanengi bavele bazalelwe baphinda bakhulela phetsheya emazweni abalisa eFrance njalo baqeqetshwe ngemfanelo. Yikho ke sikhangelele ukuthi baveze ubuntshantshu babo bonke njalo sibafisela inhlanhla.”
Kusasa ngeSonto iqembu leNigeria lizadlala leleEquatorial Guinea komunye umdlalo wesibaya sikaGroup A kuthi kusibaya sikaGroup B iqembu leEgypt lizadlala leleMozambique ikanti eleGhana lona lizadibana leleCape Verde.
Iqembu leSenegal yilo eliphethe isicoco ngemva kokunqoba eleEgypt ngo2021 ikanti eleEgypt liphutshe lisendaweni yesibili langomnyaka ka2017 lapho elinqotshwe khona ngeleCameroon.
Umncintiswano weAfcon 2023 uqala namhlanje zilitshumi lantathu kuZibandlela njalo uhlelwe ukuba ufike emaphethelweni mhla zilitshumi lanye kunyanga kaNhlolanja.
Limidlalo kwakumele idlalwe nyakenye ngenyanga kaNhlangula loNtulikazi kodwa yasidluliselwa phambili ngoba isimo somkhathi siyabe singalungelanga ukudlalwa komdlalo wenguqu ngalesosikhathi elizweni laseIvory Coast.
Your browser doesn’t support HTML5
Udaba Silethulelwa ngu Joseph Njanji.