Izakhamizi ze-Gwanda North ngoLwesibili zixotshe umphathisikolo weMatsholomotshe Primary School zimethesa icala lokungaziphathi kakuhle zisithi uyeba imali kanye lempahla yesikolo njalo udiliza imizi yabantu. Ngolwesithathu iqula logatsha lwezemfundo livakatshele kulesisikolo ukuya xoxisana labazali bona abathe phinde alugxobe umphathi kulesisikolo.
Abazali babafundi besikolo seMatsholomotshe primary labo bavukele esikolo lapho zivulwa ngoLwesibili ukuyatshela umphathisikolo uMnu. Everson Sinyolo ukuba aphume aphele kulesisikolo ngoba engaqhubi kakuhle umsebenzi wakhe.
Abazali behlangana leziphathamandla zemfundo esikolo se-Mtsholomotshe Primary School.
Ngalokhu uSinyolo usuke kulesisikolo wayabikela abakhulu bakhe kugatsha lwezemfundo eGwanda bona abaqhube umhlangano lezakhamizi ngoLwesithathu.
Ezinye zalezi zakhamizi ezingathandanga ukubethwa ngamagama zithi uSinyolo usebhidlize isikolo seMasholomoshe ebesihamba phambili kulezinye.
“USinyolo lapha ucingo lwesikolo alukho, amaclass kugcwele izikhova labomalulwane ,vele into ezinengi zifile lapha esikolo.USinyolo uyasihlupha emakhaya kubogogo bethu, usithwalise nzima ; Kambe mahlandla mangaki sibuya sikhalaza, minyaka mingaki silitshela yonke into lokuthuka ethuka,uSinyolo mina ngisahambela eGwanda South uSinyolo wayeseZenya ngiyalwazi udaba olwamsusa khonale,thathani umuntu wenu lisiphe omunye libeselisibona ukwehluleka kwethu,” kutsho omunye wezakhamizi.
Lamazwi agcizelelwe nguMnu. Mduduzi Mlilo ongumgcinisihlalo wekomidi yabazali balesisikolo othi uSinyolo nguntando kayiphikiswa.
“Ungumuntu okumele akutshele izinto kodwa lingakwazi ukubonisana kungakho kunzima ukusebenza laye ngoba ngeke liyakhe , so yena uyabe esithi ihofisi ithi kumele senze kanje wena ungela hofisi ongakhuluma ngayo.”
USobhuku weMatsholomotshe uMnu Lovemore Ndlovu uthi uSinyolo liqili njalo kahloniphi inkokheli zomdabu.
“Akulantuthuko ayenzayo esikolo ,kasafundisi okwakhe yikuthatha imali etshone eseGwanda, uyaqili abazali uyathi bebhadale amaR70 yokubhala kodwa imali zakhona azila mareceipt , ukuthi uyephotocoper yiR2 siyamangala ukuthi lawa maR70 ngawani, thina sifuna abezemfundo basiphe omunye umphathisikolo lowu asisafuni, engaphenduka lapha ngikhangelela ukuthi kungaba lengozi.”
UKhansila kaWard 1 eGwanda North uMnu. Standford Nkala uthi inengi labafundi selihamba umango omude lisiya kwezinye izikolo ezikhatshana ngoba abazali bengawelelani loSinyolo.
“Okukhona yikuthi loSinyolo kakusebenzeki, lanxa engaze ebelapha abazali besithi abasamfuni abasoze basebenze laye , khangelani ukuthi isikolo sinjani.Ngabe kuyaba lendlela atshintshwe kuphela ke sibone ukuthi kuyiwa ngaphi ngoba ukubiza umhlangano la abazali kababuyi ngoba akuzwananwa, abadala sebethethe abantwana babahambisa kwezinye izikolo.”
Imizamo yokuxoxisana loSinyolo iyehlule kodwa uMnu Sydney Sibanda isiphathamandla sogatsha lwezemfundo esiqintini seGwanda ohlangane labazali Ngolwesithathu uthi uSinyolo uzabanjwa ngamandla ukuthi ayephumula kusaphenywa udaba lwakhe.
Kusenjalo ziqhubeka zisifa inkomo esabelweni seZansi yemaNdebeleni kungenani lezulu eline ensukwini ezedluleyo.
Abogatsha lwezokulima bathi sezifika phose inkulungwane ezinhlanu 4,762 inkomo esezibulewe yindlala, uzulu ukhuthazwa ukubana aqhubeke ethengela inkomo isikuba ukuze ziphephe.
Your browser doesn’t support HTML5
Udaba Silethulelwa ngu-Albert Ncube.