Ekhuluma emhlanganweni lentathelizindaba e Harare Ngolwesihlanu, isikhulumeli se ZANU PF uMnu. Christopher Mutsvangwa uthi ibandla lakhe livumelana lesinqumo esithethwe ngele South Africa esokuphanyeka emthethwandaba wamazwe womhlaba owe International Criminal Court of Justice ( ICJ), udaba lokukhonona ukuba ele Israel libulala mahlayana izizalwane zakwele Palestine empini yalo leqembu ele Hamas.
Zanu PF Information Secretary, Chris Mutsvangwa
"Ukubona abameli be South Africa bemisa udaba lwabo besekele iPalestine, sibona ukuba ilizwe lika Mandela lenze kuhle.Yikho lathi okwenza sithole uzibuse ngokusekelwa ngamanye amazwe. Kuyasijjabulisa lokhu’’
UMutsvangwa uqhubeke ethi ukubulawa kwabesiPalestina ikakhulu abesifazane labantwana kuyadanisa esithi kumele impi leyi iphele ngokuphangisa.
Kodwa isikhulumeli seCCC, uMnu. Promise Mkwananzi uthi iZANU PF kumele iqale izinuke amakhwapha ime ukugijimela indaba zase Israel ngoba layo yephula amulungelo kazulu e Zimbabwe.
“Isekela njani uhlelo lolu ngoba bona labo kumele bamiswe kulo umthethwndaba ngoba bahlukuluza abantu eZImbabwe ikakhulu abe CCC labantu abalwela amalungelo oluntu kuleli’’
Kodwa ingcitshi ecubungula ezombusazwe esebenza lenhlanganiso yamalungelo oluntu, eye Zimbabwe Human Rights Institute uMnu Providence Nyathi uthi ukwephulwa kwamalungelo abantu besi Palestina akungeke kuqathaniswa lokwenzakala e Zimbabwe kodwa laye esekela inyathelo ele South Africa.
“Kumele sizwisiswe ukuba lapho iSouth Africa isekele iPalestine lokhu kuvela kumbali yamazwe lawa njalo lokhu kuqakathekile kuinternational relations ukwedlula okwenzakala kuleli’’
Kodwa enye ingcitshi esebenza lebandla le People’s Unity Party (PUP) uMnu Hebert Chamuka uthi indlela ele South Africa elenze ngayo kudaba lwe Palestine le Israel kumele ikwenze kudaba lwe Zimbabwe.
“Ele South Africa kumele lithathe inyathelo elifana laleli ukuze lisize ele Zimbabwe kundubo esibhekane lazo. Kunzima ukwenza okunye likhangele eIsrael lina lisehluleka ukwenza lokhu eduze’’
Ele South Africa izolo liphanyeke isicelo emthethwandaba wamazwe womhlaba owe ICJ lisithi ilizwe le Israel lephula umthetho we Genocide Convention womnyaka ka 1948 ngokubulawa okwenziwa abantu base Palestine endaweni ye Gaza.
Ele Israel liphe ubufakazi balo namhlanje lisithi lokhu likwenza ngoba abeqembu eleHamas elibunjwa ngabesiPalestina yilo elaba loqalo kulimpi ngokudubula ibulala abantu abaphezu kwenkulungwane eyodwa-1,200 base Israel lathumba abaphezu kwamakhulu amabili-240.
Loludaba luyaqhubeka lusahlulelwa emthethwandaba weICJ eeIsrael lisipha ubufakazi.
Your browser doesn’t support HTML5
Udaba lweZanu PF isekela iSouth Africa kuICJ siluphiwa nguMlondolozi Ndlovu