Umsebenzi wokuhlenga abadilikelwe ngumgodi owenjiwa igolide oweRedwing, osePenhalonga, esabelweni eseManicaland Ngolwesine ekuseni ubikwa ungasahambi ngendlela ebikhangelelwe njalo sokusesatshelwa ukuthi abantu laba bengalahlekelwa ngumpefumulo njengoba sokulusuku lwesithathu behlelwe yingozi le.
Lumsebenzi ubikwa uphanjaniswe yikuthi abahlengi abazame ukwehla emgodini izolo baphange baphuma ngoba labo sebebona bengabhekana lenkinga.
Umqondisi wenhlanganiso ebona ngezamalungelo emsebenzini wokulondolozwa kwemvelo, eyeCentre for Natural Resource Governance, umnumzana Farai Maguwu, owethekelele emgodini lo Ngomgqibelo, utshele iStudio 7 ukuthi akaboni abehlelwe yile ingozi behlengwa masinya ngoba abahlengi bengelayo imitshina yokuqhuba umsebenzi wabo ngendlela.
UMaguwu inani labantu abangabe behlelwe yingozi abaphansi emgodini lingabe lisedlula abalitshumi lanye elikhulunywayo njengoba izisebenzi zalumgodi zingabe zihlangene labanye abemba ngokungekho emthethweni, ababizwa ngokuthi ngotsheketsha.
Umgodi oweRedwing, ubikwa uphansi kwenkampani eye Metallon Gold Zimbabwe umnikazi wayo kulilunga leZanu PF, elimela iMabvuku-Tafara, edale lephalamende, umnumzana Scott Sakupwanya.
Asenelisanga ukuzwa imibono kaSakupwanya ngaloludaba kodwa abenkampani eye Metallon Gold Zimbabwe bakhiphe umbiko othi izisebenzi zabo zohlangothi lwabahlengi yibo abaphethe umsebenzi wokuzama ukuhlenga abalokhu bephansi emgodini. Ukuhlaziya loludaba sixoxe lomgcinisihlalo wenhlanganiso eyezisebenzi eyeZCTU esigabeni eseWestern Region, umnumzana Ambrose Sibindi.
USibindi uthi “Udubo esilalo eZimbabwe yikuthi emsebenzini wezemigodi akula ndlela ezicacileyo zokuvikela ingozi ezingehlela abantu besemsebenzini”
Your browser doesn’t support HTML5
Ingxoxo loSibindi ngodaba lwabadilikelwe ngumgodi ePenhalonga