Umkhuhlane ohlasela inkomo oweAnthrax ubikwa ususabalala okwethusayo eziqintini ezedlula amatshumi amathathu ezabelweni ezinengi zelizwe.
Uhulumende uthi usephume lamacebo okumelana lalumkhuhlane kodwa ingcwethi kwezokulima lokufuya zisithi lokhu akusilo qiniso elipheleleyo ngoba kunje engakatholi imithi lamajekiseni wokumelana lalumkhuhlane eyenela ilizwe lonke.
Ngaphandle kwenkomo umkhuhlane oweAnthrax lo ubikwa usuhlasele abantu abangamakhulu aphezu kwalikhulu- 518, lokhu uqhamuke nyakenye ngoLwezi kodwa akula othe wabulawa yiwo.
Uhlangothi lokwelatshwa lokunakekelwa kwezifuyo olwe Department of Veterinary Services, oluphansi kogatsha lwezokulima, lubika ukuba soluthole imibiko ethi sokufe inkomo ezedlula amatshumi amathathu-36, kusukela ngenyanga edluleyo. Osaphethe isikhundla somqondisi walolu hlangothi u- Acting Chief Director uDoctor Pious Makaya, uthi kulabantu abedlula amakhulu amahlanu-518, ababanjwe yilumkhuhlane elizweni kodwa akula mibiko yokuthi kulomuntu osebulewe yiwo. Ngakhoke uxwayisa abantu ukuthi bengadli inyama yenkomo ezifele yodwa ngoba kungazakali ukuthi ingabe ibulewe yianthrax loba hatshi.
Africa Anthrax Outbreak
Uqhubeke uMakaya ethi kunje ele Zimbabwe selithole amajekiseni okuvikela imikhuhlane eyama vaccine, evele kweleBotswana engaba zinkulungwane ezedlula amakhulu amane lengxenye- 460,000, lanxa ilizwe lidinga izigidi eziphakathi kwesisodwa-1.6 million kusiya kuzigidi ezimbili- 2million, angenela ilizwe lonke.
Udubo lokuhlasela kweanthrax ngalesi sikhathi sezulu, e Zimbabwe, uMakaya uthi luvelele kweleZambia.
lokhu kugcizelelwe ngabohlangothi lwezempilakahle enhlanganisweni yomanyano wamazwe womhlaba olwe World Health Organisation-WHO, olwethule imibiko yokuthi sokuqhamuke umkhuhlane weAnthrax emazweni amahlanu awezwekazi le Africa abalisa iMalawi, Uganda, kenya Zambia kanye lezimbabwe. Ele Zambia yilo elibikwa lihlaselwe kakhulu ukwedlua wonke lawa mazwe.
Umkhuhlane oweAnthrax ubikwa ulakho ukuthelelanwa lula ebantwini ngemva kokudla inyama yenkomo eyabibulewe yilumkhuhlane.
Izitshengiselo salumkhuhlane ezifuyweni ukuqaleka kwenkomo zisifa ngobunengi, lokukhukhumala masinya kwenkomo lapho isifilezifele, lokuguquka kombala wegazi lisiya kwelithanga.
Ebantwini lumkhuhlane uziveza ngezilonda ezibakhona emzimbeni wonke kodwa ezelaphekayo ngomuthi owamaAntibiotic.
Uphenyo oluthe lwenziwa e Zimbabwe luveza ukuba kulenkomo ezingaba yingxenye yesigidi-500,000, ezabulawa ngumkhuhlane owe anthrax, eminyakeni emithathu edluleyo, ezibiza amadola eMelika afika izigidi ezilikhulu lengxenye- US$150 million.
Your browser doesn’t support HTML5
Udaba lokuqhamuka komkhuhlane oweAnthrax eZimbabwe siluphiwa nguTaboka Ncube