Buyaqhubeka ubusela bezifuyo eZansi yemaNdebeleni lapho amasela asetshontsha lenkomo ezihlaselwe yindlala ezibhoda zidinga amadlelo.
Abogatsha lwezokulima olwe Agritex eZansi yemaNdebeleni bathi sekufe inkomo ezedlula inkulungwane ezine 4113 esabelweni seZansi yemaNdebeleni kuthi enyakatho yalesi sigaba kubikwa sekufe indlovu ezilikhulu ngenxa yendlala.
UMnu Collen Ngwenya yisakhamuzi seMatobo. U-Ngwenya uthi lanxa izulu seliqalile ukuna akusoze kwanceda izifuyo, ikakhulu inkomo kusikhatshana esizayo.
"Izulu elinileyo alikafaki ithemba ebantwini ukuthi singathi selinile, linile endaweni ezimbili ezintathu, abantu sebezaqala ukulima, abanye bebesebehlanyelile inhlanyelo sizamila.Izifuyo asikafiki esimweni sokuthi sezisindile," kutsho uNgwenya.
Ngalokhu uthi inkomo sezisabalala indawo yonke zidinga okokudla okudala ukuthi itshontshwe.
"Izifuyo zisebunzimeni ziyafa, indlala ekhona asondlala encane, ziyakufa izifuyo, ziswele amanzi ziswele amadlelo, lonaleli izulu eline kwezinye indawo kuzadala uhlumo okuzadala ukuthi zilandele loluhlumo zihambe zigcwale indawo yonke kuthi lokhu okuseleyo kulahleke ngoba lawo amasela selentshukutshu abekwazi ukuthi lezonkomo asozalapho sezitshontshwa," kutsho uNgwenya.
Lamazwi asekelwe nguMnu Gabriel Moyo oweMawane, eGwanda South, othi izifuyo ziyanyamalala ngobunengi ngalesisikhathi sendlala.
UMnu. Victor Sibanda owenhlanganiso evikela ukutshontshwa kwezifuyo eye-Gwanda Anti-Stocktheft Association uthi ukubunjwa kwalihlanganiso sokwehlise inani lenkomo ezintshontshwayo.
"Amasela lokhu eqhubeka ekhona, into esiyenzakala kathesi yikuthi sekulalaba abagamulayo bathwale kuyisitshebo, kwehlile nje kancane akusafani lalaphana behamba beziqhuba," kutsho uSibanda.
Ngalesisikhathi sendlala izifuyo kanye lenyamazana zendle zivame ukuhamba imango emide zidinga amadlelo kanye lamanzi.
Uzulu ukhuthazwa ukuba athengele izifuyo isikuba ukuze zisile indlala engezelelwa yikutshisa kwelanga.
Your browser doesn’t support HTML5
Udaba Silethulelwa nguAlbert Ncube.