Kulowesilisa weBindura oselamaviki amathathu evalelwe esitokisini ngemva kokubotshwa esetheswa icala lokuthuka uMongameli Emmerson Mnangagwa ngokuthi sebulele ilizwe walethela uzulu weZimbabwe udubo olukhulu kanye lokuthi kugcwele amasela kubandla leZanu PF.
Amagqwetha alwela amalungelo oluntu aweZimbabwe Lawyers for Human Rights athi aphakathi kokulwisa emthethweni ukuthi uMnu Patrick Kingirasi akhululwe ngoba ebotshelwe ize.
Banengi asebebotshelwe icala elifanayo phansi komthetho weCriminal Law Codification Reform Act, okuyinto eyayisenzakala kakhulu njalo phansi kombuso kamuyi uRobert Mugabe.
Ilunga lebandla aliphikisayo eleCCC uMnu Swithern Chiroodza utshele iStudio 7 ukuthi ukubotshwa kukaKingirasi kuveza sobala ububi bombuso kaMnangagwa.
Your browser doesn’t support HTML5
Ingxoxo loMnu Swithern Chiroodza
Kodwa ilunga leZanu PF uMnu Believe Gaule uthi lanxa kungayisilocala ukuchothoza uMnangagwa, kulicala ukumthuka lanxa nje amagqwetha kaKingirasi esithi kazange amhlambaze.
Your browser doesn’t support HTML5
Ingxoxo loMnu Believe Gaule