Amapholisa eLimpopo eSouth Africa abika ukuba asebambe abantu abadabuka eZimbabwe abaphezu kwabalikhulu(130), abakade besemabhasini besiya ePolokwane bengene kweleSouth Africa, bengelamaphepha.
Phakathi kwalaba bantu kubikwa kulabantwana abangamatshumi phose ayisitshiyangalombili (77).
Isikhulumeli samapholisa eLimpopo uBrigadier Hlulani Mashana uthi abatshayeli bamabhasi la sebebotshiwe.
Welekelele esithi okumangalisayo yikuthi abatshayeli laba yizizalwane zeSouth Africa ezisebenzisa amabhasi abhaliswe kulelolizwe.
Exoxa leStudio7 ngaloludaba uMnu Lizwe Dube oyinzalwa yeZimbabwe ehlala kweleSouth Africa njalo ekunhlanganiso yeProgressive Zimbabweans in South Africa uthe kuba nzima ukuthi abazali bathathise abantwana amaphepha okuhambisa, amaphasipoti njengoba edula eZimbabwe.
Lokhu kucina kubangela ukuthi abantwana beqiswe umngcele ngokungekho emthethweni, kufaka abantwana engozini yokutshontshwa.
Lokhu kuza kulandela imibiko eyakhutshwa yiSouth Africa eyokuthi kwaphenduswa eZimbabwe abantwana abedlula amakhulu amane abatholakala emabhasini angamatshumi amane lamathathu bezama ukuchapha umngcele bengela maphepha njalo bengela bazali babo.
Uhulumende weZimbabwe wakulandula lokhu esithi akuzange kwenzakale.