Abekhomishini ebona ngezokhetho eye Zimbabwe Electoral Commission bethule umbiko othi sebedinde amaphepha amatsha okuvota, amaballot papers, angela mabizo abeCCC abaxotshiswa edale lephalamende lakumakhansili ngozithi ungunobhala jikelele walelo bandla, umnumzana Sengezo Tshabangu.
Lanxa isinqumo esethulwe ngumthethwandaba oweHigh Court sisekele isicelo sikaTshabangu sokuvimba amalunga aweCCC ukuba engancintisi kukhetho lwamaBy-Elections, Ngolwesine bekungela bizo lika mnumzuna Munyaradzi Febion Kufahakutizwi, obengummeli weMabvuku-Tafara, kodwa uluhlu lwaNgolwesihlanu beselikhona igama lakhe. Okulapho abeZEC bahle bethula umbiko wokuthi akuseyi kuba lokhetho eMabvuku-Tafara, njengoba umnumzana Scott Sakupwanya oweZanu PF, engasela muntu ancintisana laye ngakhoke usekhethiwe ukuba lilunga ledale lephalamende.
U Tshabangu sonke isikhathi lesi ubetshela abantu labezindaba ukuthi kwaba liphutha ukufakwa kwegama likaKufahakutizwi kuluhlu lwabaxotshiswayo edale eleNational Assembly, kodwa isimanga Ngolwesihlanu, ibizo lakhe libonakale selikhitshiwe emaphepheni okuvota.
Ingcwethi ezibona ngezemithetho yokhetho ezenhlanganiso efana leye Zimbabwe Election Support Network, zithi umthetho uthi nxa kube lokuphikiswa kwesinqumo somthethwandaba waphansi onjengowe High Court kungafakwa isicelo sokuphikisa edale laphezulu ele Supreme, yonke into kumele ihle ime andubana idale lephezulu seliphe elaso isinqumo.
Abenhlanganiso ekumsebenzi wokufundisa uzulu ngamalungelo abantu kwezokhetho eye Zimbabwe Election Advocacy Trust, bona bathi, lokhu okwenziwa ngabe ZEC lohulumende, yikwephulwa kwelungelo labantu be Zimbabwe lokubancindezela.
Ukhetho lwama By-Elections lwenziwa ukuze kukhethwe amalunga edale ele National Assembly ezigabeni ezithobamunwemunye, abalisa iMabvuku-Tafara, Binga North, Lupane East, Cowdray Park, Bulawayo South, Lobengula Magwegwe, Beitbridge West, Nketa, Mpopoma –Mzilikazi lamakhansila alitshumi lane.
Lanxa abe CCC besithi konke okwenzakalayo elizweni yisihluku esingakaze sibonakale emazweni womhlaba njalo yimisebenzi yabe Zanu PF, bona abeZanu PF bahlala bekulandela besithi kabalani lokwenzakalayo ngokuxotshiswa kwabe CCC ephalamende lakumakhansili kodwa kuyikudonselana kwamandla okukhokhela iCCC.