Kukhanka sokulokufuthelana phakathi kukahulumende waseSouth Africa loweZimbabwe phezu kodaba lwabantwana abedlula amakhulu amane, 443, abavinjwe yiziphathamandla zeSouth Africa ukungena kulelolizwe emngceleni weBeitbridge bevela eZimbabwe ngempelasonto bengelamaphepha.
Ugatsha olubona ngokulondolozwa kwemingcele yaseSouth Africa, olweBorder Management Authority, lwethule umbiko ngoLwesithathu lugcizelela ukuthi kuliqiniso ukuthi lwenqabele abantwana laba lanxa uhulumende weZimbabwe ekulandula lokhu.
Lolugatsha luthe abantwana laba batholakale emabhasini akade evela eZimbabwe angamatshumi amane lambili, 42, njalo luthe luzaqhubeka luvikela imingcele yalo ngokwenqabela abantu abangelancwadi ezifaneleyo ukungena kweleSouth Africa.
Umphathintambo weZimbabwe obona ngokwakhiwa kwezabelo uMnu July Moyo yena wethule umbiko ngoLwesibili esithi kuphendukiswe abantwana ebedlula kancane ikhulu kuphela, 124, kwathi umphathintambo wendaba zasekhaya uMnu Kazembe Kazembe laye wethule umbiko ethukuthele esithi ngamanga akhulunywa yiziphathamandla zaseSouth Africa.
UKazembe uthe ubengenelisi ukukhuluma ngaloludaba ngoba ubesemhlanganweni.
Kodwa umphathintambo wendaba zasekhaya kweleSouth Africa uMnu Aaron Motsoaledi utshele iStudio 7 ukuthi okukhulunywa yiziphathamandla zelizwe lakhe kuliqiniso.
Kucatshangelwa ukuthi abantwana laba bebesiya ebazalini babo abasebenza kweleSouth Africa njengoba izikolo zivaliwe.
Isiphathamandla senhlanganiso ekhankasela ukulondolozwa kwamalungelo oluntu eyeIbhetshu Likazulu uMnu Mbuso Fuzwayo uthi okwenza abantwana beZimbabwe baye eSouth Africa ngobunengi ikakhulu ngekhefu leKhisimusi yikuthi abazali babo bakweleSouth Africa njalo abenelisi ukubathathisa ama-passport ngenxa yembadalo ephezulu.
Your browser doesn’t support HTML5
Ingxoxo loMnu Mbuso Fuzwayo