Uhulumende wakweleSouth Africa namuhla uqhelise ngeminyaka emibili isikhathi sokusebenza kwengwalo zezizalwane zeZimbabwe ezihlala eSouth Africa phansi kohlelo lweZimbabwe Exemption Permits.
Lokhu kutsho ukuthi ama-permits la asezaphelelwa yisikhathi ngomnyaka ka2025 mhlaka 29 ngoLwezi. Umphathintambo obona ngendaba zasekhaya kweleSouth Africa uMnu Aaron Motsoaledi wazise ukuthi engaphela, awasoze avuselelwe.
Ngokunjalo, ukhuthaze izizalwane zeZimbabwe ukuthi zikhweze amaphepha kugatsha lwakhe ukuze zingene kweminye imikhakha yama-permits ekhona.
Ama-permits ezizalwane zakweleLesotho lawo aqhelisiwe.
Aaron Motsoaledi
Amaphepha abeZimbabwe la ayemele esulwe ekupheleni kukaMpalakazi lonyaka uhulumende weSouth Africa esithi abawaphetheyo kumele babuyele elizweni labo.
Kodwa kwasuka kwangenela inkantolo yanquma ukuthi amaphepha lawa kuzamele aphelelwe yisikhathi ngomnyaka ozayo.
Ukuqheliswa kwawo ngeminyaka emibili nguMotsoaledi kujabulise izizalwane zeZimbabwe ezinengi.
Isikhulumeli senhlanganiso yeZimbabwe Community in South Africa uMnu Bongani Mkhwananzi utshele iStudio 7 ukuthi lanxa bethokoza, kumele abaphethe lezingwalo bazame ukubhalisela ukungena kweminye imikhakha yama-permits.
Your browser doesn’t support HTML5
Ingxoxo loMnu Bongani Mkhwananzi
Kusenjalo, kulesizalwane seZimbabwe esile-permit yohlobo lweZimbabwe Exemption Permit, uMnu Eric Sibanda, othi uke wabotshwa wavalelwa ejele okwenyanga yonke lanxa nje amaphepha akhe ebehlelekile.
Le kubikwa kuyinto enzakalayo kwabokuza abanengi South Africa. USibanda uthi uhlukumezekile kakhulu ngalokhu.
Your browser doesn’t support HTML5
Ingxoxo loMnu Eric Sibanda
Umsakazo weStudio 7 uzamile ukuxhumana labogatsha lwendaba zasekhaya kweleSouth Africa kodwa bebengadobhi incingo zabo.