Umanyano weUnited Nations uthi lonyaka ngo2023 ilanga litshise ukwedlula eminye yonke iminyaka embalini yomhlaba.
Lokhu kuvezwe ngunobhala jikelele weUN uMnu António Guterres ngesikhathi evula umhlangano wokuhlaziya udaba lokuguquka komkhathi, oweCOP28, wona oqhutshelwa kweleUnited Arab Emirates.
Umhlangano lo usungule isikhwana sokuncedisa amazwe asathuthukayo ukulwisana lomthelela wokuguquka komkhathi lokhu, i-climate change.
Kulesisikhwama eleUAE lifake iUS$100 million, eleBhilithani US$76 million kwathi eleMelika lona lafaka iUS$17 million.
Umhlangano lo uza ngesikhathi isidla ubhedu eZimbabwe lasemazweni asemhlubulweni weZansi yeAfrica ngenxa yesikhudumezi esilethwa ngumumo weEl Nino.
Inengi libhekane lendlala embi eZimbabwe kanti lezifuyo lenyamazana zasendle lazo ziyafa.
Ingcwethi ecubungula ezokulima uMnu Mandla Nkomo utshele iStudio 7 ukuthi isikhudumezi salonyaka siveza ukuthi amazwe omhlaba kumele abambane ukuze athathe amanyathelo okulwisana lomthelela wokuguquka komkhathi.
Your browser doesn’t support HTML5
Ingxoxo loMnu Mandla Nkomo
Umhlangano weCOP28 Climate Summit uvulwe ngoLwesine kweleUnited Arab Emirates.