Inhlanganiso yomanyano wamazwe omhlaba eyeUnited Nations isikhuthaze ukuthi kuqhutshwe uphenyo kulandela ukuthunjwa lokubulawa kukaMfundisi Tapfumanei Masaya, obelilunga lebandla eliphikisayo eleCCC.
uMasaya uthunjwe endawonye loMnu. Jeffrey Kalosi ngabantu ababehlomile abanakanelwa ukuba ngabeviyo labasebenza nsitha abe CIO.
Bathunjwa emini libalele ngesikhathi bekhankasela ozamela ibandla leCC kukhetho lwama by-elections oluzaqhutshwa mhlaka 9 Mpalakazi eMabvuku Tafara, uMnu Febion Kufahakutizwi.
Kusikhatshana esedluleyo kuthunjwe njalo amanye amalunga ebandla leli athi oMnu. Takudzwa Ngadziore lo James Chidhakwa kodwa akula muntu osethe wabotshwa ngalamacala laloba kulemifanekiso yabantu abathumba uNgadziore eyakhitshwa ebulenjini.
Amapholisa athembisa ukuthi azaphenya lezindaba kodwa akukabi lobotshiweyo kuze kube namhlanje.
Inhlanganiso yamabhishopu eRoma eyeZimbabwe Catholic Bishop Conference layo ikhuphe umbiko izolo isola udlakela lokuthunjwa kwabantu, njalo ikhuthaza ukuthi abakhokheli bezombusazwe bavikele amalungelo oluntu.
Exoxa leStudio 7 uMnu Effie Dlela Ncube, ingcwethi ecubungula ezombusazwe esebenza lenhlanganiso emela amalungelo abathengi eyeNational Consumer Rights Association uthi umbiko weUnited Nations uqakathekile njalo ufanele ulalelwe njengoba imithetho evikela amalungelo oluntu isephulwa mahlayana eZimbabwe.
Your browser doesn’t support HTML5
Ingxoxo loMnu Effie Dlela Ncube ngombiko weUN osola ukuthunjwa kwabantu.