Abanye babantu abathunjwa yiHamas ngemva kokuhlasela eyakwenza ngenyanga edluleyo eIsrael balakho ukukhululwa kusasa, kulandela isivumelwano esaziswe yiQatar.
Phansi kwesivumelwano lesi amabutho e-Israeli azakuma ukuhlasela eGaza okwamalanga amane.
IQatar ithe iHamas izakhulula abesifazane labantwana abangamatshumi amahlanu, kukanti i-Israel layo ithe izakhulula amaPhalestina esifazane labantwana abavalelwe entolongweni ze-Israel.
Isivumelwano lesi esaziswe namuhla ekuseni siza ngemva kokukhulumisana okwamaviki ambalwa obekukhokhelwa yiQatar, iMelika leEgypt.
IMelika ithi phakathi kwabantu abazakhululwa yiHamas bakhangelele ukuthi kulezizalwane zeMelika ezimbalwa.
Ekhuluma leStudio7 ngaloludaba uMnu Nhlanhla Moses Ncube, ingwethi yezombusazwe njalo engunobhala jikelele wenhlanganiso elwela amalungelo oluntu eyeFreedom Alliance ukhuthaze amacele omabili ukuthi ahle akhulumisane ngesivumelwano sokumisa impi ukuze kuvinjwe ukufa kwabantu.
Your browser doesn’t support HTML5
Ingxoxo loMnu Nhlanhla Moses Ncube ngempi yeIsrael leHamas.