Abasakhulayo abanengi bathi sebesesaba ukuveza ukuthi basekela aphi amabandla ezombusazwe kumbe ukuya emihlanganweni yamabandla abo, besithi lokhu kufaka impilo zabo engozini kulandela ukuthunjwa lokubulawa kwelunga leCCC uMnu Tapfumaneyi Masaya.
Ontanga bathi sebenanzelele ukwanda kwalabo abakumabandla aphikisayo abathunjwayo, betshaywe kakubi njalo abanye bebulawa njengoMasaya.
Omunye walabo abathi kungcono ukuhlala bengaziwa ukuba basekela ibandla liphi nguPhephelaphi Maseko ohlala eMzilikazi, koBulawayo.
“Mina ngingakhuluma ngendaba zombusazwe labangani bami kuphela, njalo ngingabatshela ukuthi ngisekela liphi ibandla. Kodwa ukuthi ngiphume mgceke lapha elokitshini lapho engihlala khona, kumbe ngikuveze ebulenjini bokuxhumana, hayi akwenzi. Ngiyesaba ukuthi abantu abangavumelani leqembu engilithandayo, bengangihlukumeza, yikho ngisithi kungcono ukuthi ezombusazwe kube yimfihlo yami.”
Omunye njalo osakhulayo ohlala eLower Gwelo uMnu Sipho Mlotshwa, ongumsekeli weCitizens Coalition for Change, usole abebandla leZanu PF esithi yibo abathumba kanye lokuhlukuluza amaluga eCCC.
“Ilizwe lonke liyakwzi ukuba abeZanu yibo abaqala umsindo ngoba bathemba ukuthi amapholisa kanye lemthethwandaba iyabasekela. Lakubona ngaphi ukuthi umuntu ophambaniselweyo nguye obotshwayo, kodwa olecala, etshiywa ezihambela? Sifuna utshintsho lapha elizweni, ukokuncindezelwa ngababusayo khathesi, hayi sokwanele.”
Kodwa unobhala wabatsha kubandla leZanu PF koBulawayo, uMnu. Admire Masikati uthi ibandla lakhe letheswa amacala elingawaziyo.
"Ngesinye isikhathi, siyabazwa abantu besithi ibandla lethu lenze lokhu lalokhu, kodwa singakhangelisisa, kuyabe kungela okubambekayo, okusithola sile cala. Kodwa nxa kukhona okwenzakalayo eqinisweni, kufanele kulungisiswe."
Banengi abasekeli bebandla leCCC abathunjwe kumaviki ambalwa edluleyo batholakala betshayiwe balimala kakubi, abagoqela yena uTapfumaneyi Masaya, othunjwe ngabantu abacatshangelwa ukuthi ngabeZanu PF.
Kumaviki amathathu edluleyo, ummeli wabasakhulayo edale lePhalamende owebandla linye, uMnu Takudzwa Ngadziore, laye uthunjwe watshaywa kabuhlungu ngabantu ababehlome ngemibhobho yohlobo lweAK-47, abacatshangelwa ukuba ngabacuphi bakahulumende, amaCIO, bebambene labasekeli beZanu PF.
UNkosikazi Lethubuhle Ndlovu, isikhulumeli sabatsha kubandla leMDC, uthi ukubulawa lokuthunjwa mahlayana kwabantu kweza ukuthi abasakhulayo bengafuni ukuphatheka kwezombusazwe.
“Udlakela endabeni zombusazwe yilo olwenza ukuthi abasakhulayo bathi kungcono ukutshiyana lakho okwepolitiki ngoba bayesabela impilo zabo. Bengayekela okombusazwe, sizabathola ngesinye isikhathi sebengenana lezidhakamizwa. Loba kutshiwo ukuthi ontanga yibo abakhokheli banamuhla lakusasa, njalo kumele bakhululeke ukutshengisela lokhu abakufunayo- yikukhuluma kodwa, ngoba akula muntu obalalelayo. Balutshwane abasakhulayo abathola isibindi sokuqhubeka ngezombusazwe, bebona omakhelwane benyamalaliswa zindaba ezinje.”
Ocubungula indaba zabatsha, uMqoqi Ncube, osakhulayo ohlala koBulawayo, njalo ekhokhela intsha yensonto angathandanga ukuthi ivezwe ngegama, uthi okwenzakalayo elizweni kwephula ilungelo labasakhulayo lokuphatheka kwezombusazwe.
“Bengezwa kuthwa kulabathunjiweyo, abatshayiweyo kumbe abafileyo abakundaba zombangazwe, abatsha bacina sebesesaba ukukhokhela ezigabeni ngoba bayabe bengasuthiseki ukuthi impilo zabo zisengozini kumbe hatshi. Nxa ususebenza usesaba, awusoze usebenze ukhululekile.Lokhu kubuya kube yikuhluthunywa okungekho emthethweni, kwamalungelo abo endabeni zombusazwe."
UMqoqi wengeze wathi uhulumende ulomlandu wokunakekela ilungelo lokungena kwezombusazwe kwabontanga.
“Okwenzakalayo lokhu kungalungiswa nxa ingatsha zikahulumende ezithi amapholisa, lemthethwandaba bengaphakama bakhusele ekulondolozeni ilungelo labasakhulayo. Kufunakala izijeziso ezibuhlungu ebantwini batholakala belamacala okuthunja kumbe okutshotshozela udlakela. Kungekela ukwenziwa lokhu, kutsho ukuthi ilizwe lizalahlekelwa ngabakhokheli abalengqodo ezimqotho lemicijo engcono ekukhokheleni ilizwe.”
Loba ilizwe likhangelane lokhetho lwama-by-elections oluzakwenziwa mhlaka 9 ngenyanga ezayo esigodlweni- eHarare, koBulawayo lakwezinye indawo, ingcwethi ezicubungula indaba zabatsha zithi ngenxa yokungathembeki kwenkundla yezombusazwe, kungabangela ukuthi babe balutshwane ontanga abazavota kulolukhetho.
Indaba zokuhlukunyezwa kwabantu abaphatheka kwezepolitiki besekela amabandla aphikisayo, sezibhahile eZimbabwe, kungenani lokuthi abakhokheli bamabandla ezombusazwe, batshona betshumayela ivangeli lokuthula.
Your browser doesn’t support HTML5
Udaba lomumo wezombusazwe ophazamisa abatsha silwethulelwa nguTobias Mudzingwa.