Okuphume emthethwandaba Ngolwesibili, kuveze ukuba kulezisekelo zokunqondiswa kwaleli bandla ezimbili, esinye esilethwe nguTshabangu, lesilethwe ngabe CCC.
UMahluli wedale leHigh Court, uJustice Tawanda Chitapi udlulisele phambili inyathela lokwethula isinqumo edabeni lapho ibandla le CCC elithi umnumzana Sengezo Tshabangu, wazifaka ukuba ngosaphethe isikhundla sikanobhala jikelele webandla leli, okungekho emthethweni.
Ngemva kokuzwa amagqwetha aweCCC lakaTshabangu besipha ubufakazi kudaba lapho abeCCC bethi kabamazi uTshabangu, kulapho athethe inyathela lokuthi usakakhangelisise konke lokhu andubana ethule isinqumo.
Ekhuluma esemthethwandaba we High Court elinye igqwetha elimela iCCC uMnu Agency Gumbo utshele intathelizindaba ukuba njengebandla bafunga bemba phansi ukuba kabamazi uTshabangu.
"Siphume edale lapha sicela ukuba kubonakale iqiniso ukuthi abakhokhela CCC ngobani. Thina asimazi vele ngoba lalapho akhethwa khona akwaziwa, yikho esikumeleleyo."
Uqhubeke esithi kusobala ukuba uTshabangu uzama ukukhokhela ibandla angelani lalo ngoba wehlulelekile ukuchasisa phambi kwedale ukuba wakhethwa ngubani loba ngaphi.
"UTshabangu azama ukukwenza yikuthatha intando yabantu ephume enguye osikhokhelayo. Konke lokhu kuzaphela ngoba abantu bayayazi inkokheli yabo."
Kodwa iqgwetha lika Tshabangu uMnu Nqobani Sithole uthe balethemba ukuba idale lizakupha isinqumo esizabathabisa.
"Laba abazithi yi CCC bathi uTshabangu kasiye nobhala. I CCC esiyibone namhlanje ilesisekelo sabo njalo leyo CCC thina kasiyazi. UTshabangu kasiyo nobhalane waleyi. I-CCC ekade iyi MDC yiyo ekhokhelwa ngu Tshabangu."
UJustice Tawanda Chitapi uthe uzakutsho isinqumo sakhe kudaba lolu ngemva kokuhlolisisa akuzwe kusethulwa ngamacele womabili emthethwandaba namhlanje. Kodwa akavezanga ukuba linhlolisiso uzayenza okwesikhathi esingakanani njalo akabethanga ilanga lapho azakwethula lesi sinqumo.
Your browser doesn’t support HTML5
Udaba lweCCC lo Sengezo Tshabangu oluseHigh Court Silwethulelwa ngu Mlondolozi Ndlovu.