Amagqwetha amela ozithi ungunobhala jikelele weCCC, uMnu Sengezo Tshabangu, namuhla akhweze amaphepha emthethwandaba ecela ukuthi uvimbe amalunga alelibandla axotshiswa nguTshabangu, ukuncintisa kukhetho lokudinga abameli abatsha edale lePhalamende lakumakhansili, olwama-by-elections oluzakwenziwa mhlaka 9 ngenyanga ezayo.
Igqwetha likaTshabangu, uMnu Nqobani Sithole utshele intathelizindaba emthethwandaba weHigh Court namhlanje, ukuba bafuna ukuvimba amalunga lawa ngoba asebenzisa ibizo leCCC okungekho emthethweni ngemva kokuxotshwa kubandla nguTshabangu.
"Sesihambise enkantolo ukuba labo esabaxotshayo bengangeni kuma by elections. Sikhuluma ngalaba abazangena kukhetho luka mhlaka 9 December"
Igqwetha likaTshabangu, uMnu Nqobani Sithole
Kodwa iziphathamandla zeCCC ezisola uTshabangu zisithi usetshenziswa libandla leZanu PF, zikutshaye indiva lokhu, zathi zizaqhubeka ngamalungiselelo okhetho.
Nansi isiphathamandla salelibandla esibona ngenhlelo zokhetho uNkosikazi Ellen Shiriyedenga.
"Asikulaleli okutshiwo ngu Tshabangu.Ama by elections lawa njengabandla siyakwazi ukuba bafuna singaphumeleli. Sikhuthaza abantu ukuba njengo ku vota kwabo ngo Ncwabakazi baxotsha abantu, asivoteni sitsho izifiso zethu"
Ingcitshi kwezombusazwe esebenza lenhlanganiso yeZimbabwe Democracy Institute (ZDI) uMnu Bekezela Gumbo utshele iStudio 7 ukuthi iCCC kuzamele ithathe amanyathelo aqinileyo ukulungisisa udaba lukaTshabangu.
Zimbabwe High Court
"Kumele iCCC iphange ibeke isesekelo sombuso ukuze iqede indubo lezi ngoba siyakwazi ukuba nxa kungela lokhu kuza qhubeke kulokuphikisana okukhona lokhu ."
Udaba lolu lungene eHigh Court namuhla ngesikhathi amalungiselelo ama-By- elections esekusibanga saphezulu.
Kusenjalo, olunye njalo udaba obe lusemthethwandaba namhlanje lapho iCCC ethi ifuna uTshabangu evinjwe ukuqhubeka esebenzisa ibizo layo njalo esithi ungunobhala jikelele walelibandla, ludluliselwe phambili ngu Mahluleli uJustice Tawanda Chitapi.
UChitapi uthe ufuna isikhathi sokuba azwe lokho okutshiwo ngamagqwetha eCCC lakaTshabangu ukuze aphe isinqumo sakhe NgoLwesibili.
Iggwetha lika Chitapi uMnu Obey Shava uchasise ngokwenzekale emthethwandaba namhlanje.
"Udaba lolu luzawakala kusasa ngoba uMahluleli ufuna ukuba azwe lokho esemuphe khona. Sizakuza edale kusasa emini lapho azakupha khona isinqumo sakhe "
U Tshabangu uqale ukuxotshisa amalunga eCCC kumadale womabili ePhalamende, eleNational Assembly leleSenate kanye lakumakhansili ngenyanga edluleyo.
Okwamanje kulamalunga angamatshumi amabili lambili-42, awephalamende asewaxotshisile lamakhansila angamatshumi phose ayisikhombisa-69 elizweni lonke.
Umthethwandaba weHigh Court wethule isinqumo sokumisa uTshabangu ukuxotshisa amalunga eCCC ngoLwesibili olwedluleyo, kodwa ngosuku lunye uSomlomo wePhalamende uMnu Jacob Mudenda uxotshe amanye njalo amalunga eCCC ngemva kokwamukela incwadi kaTshabangu kungelani lesinqumo somtehthwandaba.
Your browser doesn’t support HTML5
Udaba lwabeCCC abaxotshiswa ephalamende nguTshabangu siluphiwa nguMlondolozi Ndlovu