Ilunga leCCC elithunjwe ngabantu abacatshangelwa ukuthi ngabasekeli beZanu PF latholakala lifile uMnu Tapfumaneyi Masaya ungcwatshiwe eHarare ngoMgqibelo lapho umkhokheli weCCC uMnu Nelson Chamisa asole khona uhulumende kaMongameli Emmerson Mnangagwa esithi nguye obulale uMasaya.
Babuthene ngamakhulu abasekeli beCCC emathuneni eMabvuku-Tafara bephelekezela uMasaya, zehla izinyembezi abanengi befuthelana kakhulu ngochuku omunye wabo abulawe ngalo.
UMasaya uthunjwe ngeviki edluleyo ngabantu abacatshangelwa ukuthi ngabacuphi bakahulumende, amaCIO, labasekeli beZanu PF, wazotholakala efile umzimba wakhe uganyulwe waganyulwa ngezikhali iCCC ethi kungaba ngamabhemba.
Uthunjwe ngesikhathi ekhankasela ibandla lakhe phambilini kokhetho lwamaby-elections eMabvuku.
Ekhuluma emngcwabeni lo, uChamisa uthe igazi likaMasaya libalelwa ezandleni zeZanu PF lohulumende kaMnangagwa.
Uthe kubuhlungu ukuba imuli kaMasaya isilahlekelwe ngubaba otshiye abantwana abathathu, esithi abantu kumele batshengise ukuthukuthela ngokuvotela iCCC kukhetho lwama-by-elections oluzakwenziwa mhlaka 9 ngoMpalakazi.
“Kuzakuba lenkokheli entsha eZimbabwe. Kuzakuba lenkokheli esaba uNkulunkulu kuleli. UMasaya uthunjwe engumfundisi. Usehlanyele inhlanyelo ezakwenza kube lempilo enhle kuleli,” kutsho uChamisa.
UChamisa wengeze wathi uhulumende weZanu PF kumele etshiyane lokuthumba abasekeli bebandla lakhe ngokuphangisa.
Amazwi akhe agcizelelwe ngobona ngenhlelo zokhetho kuCCC uNkosikazi Ellen Shiriyedenga, yena othe, “Bayaqhubeka bebulala abanye bethu kodwa lokhu akusoze kwenze i Zanu PF inqobe kukhetho.”
Kodwa isikhulumeli seZanu PF uMnu Farai Marapira uthe ibandla lakhe alilani lokwenzakala kubasekeli beCCC, esithi nxa kukhona ukwethuselwa kumbe udlakela abebandla leli kumele bamangale emapholiseni.
Uthe: “NjengeZanu PF asilandaba lokukhulunywa libandla eliphikisayo. Sifuna ukuba owenze lokhu agwetshwe kwelinye ilanga.”
Isigodlo sommeli weMelika eZimbabwe kanye lenhlanganiso ezizimeleyo ezifana leHuman Rights Watch zithi uhulumende kumele aphenye loludaba kujeziswe labo abenze lobubudlova.
Abanengi abakhulume emngcwabeni kaMasaya bamchaze njengomuntu owayethanda ibandla leCCC njalo ekhankasa ngokuthula, engumfundisi njalo ozithobileyo.
Your browser doesn’t support HTML5
Udaba Siluphiwa nguMlondolozi Ndlovu