Ibutho le-Israeli lingene esibhedlela seShifa eGaza namuhla ekuseni, lidinga amabutho eHamas, ayafakwa yiMelika kuluhlu lwamaterrorist. Ibutho le-Israel lazise iziphathamandla zohlangothi lwezempilakahle ukuthi lizakuba lingena kulesi sibhedlela kusele imizuzwana ukuthi lingene.
Ibutho le Israel Defense Forces kumbiko walo lithe, "kulandela imibiko yabacuphi, ibutho leli liqhuba uhlelo lokulwisana leHamas kwezinye indawo zesibhedlela seShifa.
Ibutho leli lithe lilamanye amalunga angamadokotela kanye lakhuluma ulimi lweArabic afundela ukuqhuba inhlelo ezinje ngenhloso yokubona ukuthi abalimazi abantu kazana." Ibutho leli lengezelele lisithi selingenisa amaincubator abantwana, ukudla kanye lemithi esibhedlela lesi.
Umqondisi wohlangothi lwezempilakahle eGaza uDr. Munir al-Bursh, utshele intathelizindaba ze-Al Jazeera ukuthi ibutho le-Israeli lihlasele ingxenye engempumalanga yalesi sibhedlela.
Kusikhatshana esedluleyo, IMelika ivumelane le-Israel isithi i-Hamas ilwa icatsha ngezibhedlela. I-Israel ithi isigodlo se-Hamas siphansi kwesibhedlela seShifa.
I-Hamas kanye lesibhedlela ziyala lokhu.
Ekhuluma leStudio7 owayeyintathelizindaba edumileyo eZimbabwe njalo esengusomabhizimusi eBhilithane uMnu Bekithemba Mhlanga uthi amacele omabili kufanele alandele umthetho ovikela abantu abangahlomanga ngesikhathi sempi.
Your browser doesn’t support HTML5
Ingxoxo loMnu Bekithemba Mhlanga ngempi yeIsrael LeHamas.
Ingcwethi yezombusazwe njalo engumbalisi ekolitjini leNational University of Science and Technology uMnu Stevenson Dlamini yena ukhuthaze iIsrael leHamas ukuthi ziqakathekise ukuvikeleka kwabantu makhaza.
Your browser doesn’t support HTML5
Ingxoxo loMnu Stevenson Dlamini ngempi yeIsrael leHamas.