Ilunga ledale leSenate yeMelika elihlala kukomidi ebona ngobudlelwano balelolizwe lamanye amazwe, uSenator Jim Risch, usesole kakhulu ukubulawa kwelunga leCCC uMnu Tapfumaneyi Masaya, wakhuthaza uhulumende welizwe lakhe ukuthi ethathele uhulumende weZimbabwe amanyathelo alukhuni ukuze etshiyane lokuhlukuluza abamabandla aphikisayo lokwephula amalungelo kazulu.
Eloba enkundleni yeX izolo, uSenator Risch uthe ukuthunjwa lokubulawa kukaMasaya ngabantu abacatshangelwa ukuthi ngabacuphi bakahulumende labasekeli beZanu PF kuveza sobala ukuthi uhulumende kaMongameli Emmerson Mnangagwa uya phambini ngezenzo ezimbi.
Isigodlo sommeli weMelika eZimbabwe laso sisole ukubulawa kukaMasaya, yena otholakale egongodiwe ngemva kokuthunjwa ngoMgqibelo ngesikhathi ekhankasela ibandla lakhe eMabvuku phambilini kokhetho lwama-by-elections oluzakwenziwa endaweni ezimballwa ngoMpalakazi.
Inhlanganiso ezilwela amalungelo oluntu ezibalisa iHuman Rights Watch, Amnesty International kanye leyeSouthern African Human Rights Defenders Network lazo zethule umbiko zibambene zisola kakhulu lobubudlova.
Sixoxe lesiphathamandla senhlanganiso elwela amalungelo oluntu eyeIbhetshu Likazulu uMnu Mbuso Fuzwayo.
Your browser doesn’t support HTML5
Ingxoxo loMnu. Mbuso Fuzwayo.
Isikhulumeli sebandla leZanu PF uMnu Farai Marapira yena uthi ibandla lakhe alilani lokwenza lokuthunjwa kwamaluga eCCC lokubulawa kukaMasaya.
Isikhulumeli sikahulumende uMnu Nick Mangwana ubengadobhi umakhalekhukhwini wakhe. Isikhulumeli samapholisa uMnu Paul Nyathi wethule umbiko izolo esithi basaphenya.