Ele Melika leleBhilithani asethule ezinye izijeziso zenotho eziqondiswe kwabeqembu lebutho ele Hamas, lakwele Palestine elilwisana lele Israel emizameni yokwenqabela ele Iran labangane balo ekuncediseni iHamas kule impi esingene kunyanga yesibili.
Umpathintambo obona ngezemali kuhulumende weMelika unkosikazi Janet Yellen wethule umbiko othi ilizwe lakhe leleBhilithani ngokuthatha leli nyathelo azama ukuvimba iHamas ukuthi ingainyeleli uncedo lwemali yokuqinisa impi yayo le Israel.
Lokhu kugcizelelwe ngumpathintambo wezobudlelwano beMelika lamanye amazwe womhlaba, umnumzana Antony Blinken othi lezi zijeziso zizanceda kakhulu ukuthi iHamas ingatholi uncedo lokuthenga izikhali.
Ele Israel lithi abe Hamas babulele abalelo lizwe abaphezu kwenkulungwane-1,200, ngenyanga edluleyo bathumba abaphezu kwamakhulu amabili-240, abane babo asebakhululwa. Abe Israel baphindisele ngokubulala abesiPalestina abazinkulugnwane ezilitshumi lanye- 11,000 abagoqela abesifazane labantwana.
Iqembu ele Hamas likuluhlu lwamazwe agoqela ele Israel, iMelika, European Union, Bhilithani lamanye lwamaqembu abalwa becatsha abedlulisa amalawulo kumbe ama Terrorist.
Ukuhlaziya loludaba sixoxe lengcwethi ecubungula ezomnotho umnumzana Masimba Kuchera, osebenza lenhlanganiso eyeCenter for Disability and Development, yena othi usekela labo abakhuthaza ukumiswa kwale impi, phakathi kwe Israel leHamas.
“Abantu abanjengoMongameli Joe Biden waseMelika lenkokheli yamazwe awe Europe yibo abalakho ukukhuza lipi ukuze ingabi lokhu ibhibhidla,” kutsho uKuchera.
Your browser doesn’t support HTML5
Ingxoxo loKuchera ephathelane lempi yeIsrael leHamas