Ilunga leCCC elithunjwe ngoMgqibelo eMabvuku, uMnu Tapfumanei Masaya, utholakale efile eHarare, ngoMvulo.
Obengummeli weMabvuku edale lePhalamende uMnu Febion Munyaradzi Kufahakutizwi utshele iStudio 7 ukuthi amapholisa afumene isidumbu eHarare, basebesiyasikhangela bathola ngempela ukuthi umufi nguMasaya, yena obengumfundisi njalo obeleminyaka yokuzalwa engamatshumi amahlanu lanye, 51.
UMasaya uthunjwe ngoMgqibelo eseMabvuku lelinye njalo ilunga leCCC, uMnu Jeff Carlos ngabantu abacatshangelwa ukuthi ngabacuphi bakahulumende, amaCIO, bencedisana labasekeli beZanu PF.
I-CCC ithi abathumbe ababili laba bebesebenzisa imota yelunga leZanu PF uMnu Scott Sakupwanya, yena ongaphendulanga imibuzo esimthumele yona.
UMasaya loCarlos babikwa behlelwe yilesi siga bephakathi kokukhankasela ibandla labo eMabvuku leTafara lapho okwenziwa khona ukhetho lwama-by-elections kulandela ukuxotshiswa kukaKufahakutizwi ePhalamende nguMnu Sengezo Tshabangu.
UCarlos yena utholakale epulazini leChabwino, eShamva, esigabeni seMashonaland Central, etshayiwe walimala kakubi wahle wasiwa kwesinye isibhedlela eHarare.
Ekhuluma isidumbu sikaMasaya singakatholakali, obona ngomsebenzi wabahlukunyeziweyo kulelibandla uNkosikazi Vongai Tome uchasisele iStudio 7 ngokwenzakeleyo.
"Bathunjwe bebabili ngo Mgqibelo kodwa omunye wabo lokho engakatholakali. Sithwele nzima ukuba singenza njani ngoba amalunga ebandla lethu aqhubekela phambili ethunjwa thina silungiselela ukhetho. Sesitshele amapholisa awe Mabvuku ngodaba lolu."
Kodwa isikhulumeli samapholisa uMnu Paul Nyathi uthi bangabe bamangala emapholiseni abeCCC kodwa loludaba alukafiki kuye.
"Nxa beqinisele ukuba batshela amapholisa sizadingisisa ukuba udaba lolu lwenzakala njani."
Isiphathamandla seZanu PF esigabeni seHarare, uMnu Taurai Kandishaya uthi ibandla lakhe alilani lezehlakalo zokuthunjwa kwamalunga eCCC.
"Siyakwazi ukuba batshona beqambela ibandla lethu amanga. IZANU PF ayilani lakho lokho okwenzakalayo. Thina esikwenzayo kuphela yikuba siyancintisa lokukhankasela ukhetho"
Kunsukwana ezedluleyo kuthunjwe elinye njalo ilunga leCCC elimela abatsha edale lePhalamende uMnu Takudzwa Ngadziore ngabantu ababehlome ngombhobho wohlobo lwe-ak 47 watholakala etshiyiwe njalo elimele kakubi. Lanamuhla lokhu akulamuntu osebotshiwe phezu kwesehlakalo lesi lanxa nje abathumbi bakhe bebikwa besazakala.
Your browser doesn’t support HTML5
Udaba lokutholakala kwesidumbu sikaMasaya siluphiwa nguMlondolozi Ndlovu