Impi phakathi kwe-Israel le-Hamas iqhubekela phambili ngalesi sikhathi isingene kunyanga yesibili.
Amazwe omhlaba kanye labenhlanganiso yomanyano wamazwe omhlaba eye-United Nations bekhuthaza ukuthi imiswe okwesikhatshana ukuze kuphathiswe abalimeleyo kanye lokungenisa usizo esihlengeni seGaza.
Ibutho le-Israeli selangena esihlengeni seGaza liqhubekela phambili lilwisana lebutho le-Hamas kulindawo.
Uhlangothi lwezempilakahle olukhokhelwa yi-Hamas luthi inani labantu asebefile eGaza selisedlula inkulungwane ezilitshumi lengxenye. Kukanti inani labafayo e-israel kulimpi kubikwa lisedlula inkulungwane lengxenye.
Inhlanganiso yomanyano wamazwe omhlaba eye-United Nations ithi abantu abedlula inkulungwane ezingamatshumi amahlanu (50 000) sebebalekele imizi yabo beluqondise ezansi yeGaza.
IStudio7 ixoxe lengcwethi yezombusazwe njalo engumbalisi ekolitjini leNational University of Science and Technology umnu Stevenson Dlamini yena othi impi le ilakho ukuphazamisa inotho yeZimbabwe njengoba iZimbabwe ithengiselana le-Israel kanye lamanye amazwe asebenzelana lalelo lizwe.
Your browser doesn’t support HTML5
Ingxoxo lo Mnu Stevenson Dlamini ngempi ye Israel leHamas.wav