Amankampani abakumsebenzi wezokwemba kwamadayimana emazweni awezwekazi leAfrica athe gwaqa eVictoria Falls, emhlanganweni oweAfrican Kimberley Process Plenary Meeting, wokuhlaziya inhlupho lokudinga amacebo okuthuthukisa lumsebenzi kuleli zwekazi.
Lumhlangano wenziwa ngesikhathi inhlanganiso ezililihlo likazulu zisithi inzuzo yamadayimani le kumele ihletshunelwe izakhamizi zaleyondawo, zikhala ngesimo sobuyanga inengi elikilo loba lisenzikini yalinotho.
Kungaleso sizatho omunye wabasekeli bakamongameli welizwe, uMnumzana Kembo Mohadi ethe emizameni yokuqeda ukufuthelana emsebenzini wokwabelanwa kwenzuzo, ephuma emsebenzini wokwembiwa kwamatshe aligugu elizweni, uhulumende usephume lohlelo lokuthuthukisa izigaba ngaphansi kwenkampani eyeZimbabwe Consolidated Diamond Company.
“I-ZCDC isibeke imali engange US$1.2 ezamela ukuthuthukisa inhlalo kazulu ngaphansi kohlelo lokwelulwa kwengalo olwe Corporate Social Responsibilty ngakho kuzazohlalwa lezakhamizi bephawule inhlelo abazifisa ziqhutshwe ezigabeni zabo.”
African Kimberley Process plenary meeting
Ehlaziya ngalelinyathela, umnumzana Rejoice Ngwenya omele inhlanganiso ye Coalition for Market and Liberal Solutions uthi inzuzo yemvelo kumele yabelwe uzulu walowo mango kulandelwa isisekelo sombuso hatshi ukuthi kuphathwe angani yikwelulwa kwengalo yosizo.
“ICSR kayiso-obligation, ngumnikelo nje, lokhu kutsho ukuthi amankampani la ema China la kufuze bebekwazi ukuthi izithelo lezi ziyanikezwa abanikazi bomhlabathi ngoba thina asisoze sibelomhlabathi lapho okuthathwa khona izinto zonke lezi zisiwa eChina.”
UMnumzana Shamiso Mtisi wenhlanganiso yamagwetha amele ilungelo likazulu eye Zimbabwe Environmental Lawyers Association, utshele inkokheli zezwekazi leAfrica ukuba izakhamizi ezinengi sezihluthunelwe ilungelo ngamankampani ngamankampani akumsebenzi engakhangeli ukuthuthukisa lezo zigaba.
African Kimberley Process plenary meeting
“Sifuna amadayimana la abalenzuzo kuzizalwane zelizwe, njalo sifuna akhuphule ingcebethu kahulumende ngezomnotho kuzwekazi lonke le Africa. Sifuna inguquko kolokhu.”
Lokhu kugcizelelwe nguNgwenya othi lelil izwe lisese yiRhodesia kulamankampani afana labo Rio Tinto, Shamva Mine, Ziscosteel lamanye, ayethuthukisa indawo ayesebenzela kizo.
“Amankampani la ayesakha amadolobho, izibhedlela, imigwaqo kanye lezikolo yikho lapho esakhulela khona, imithetho yokwemba yayiqinisa ilungelo lezakhamizi ezikhona.”
Kunje izakhamizi zeHwange eDinde zidonselana intambo lohulumende ngemva kokunikezwa imvumo kweyinye yenkampani yakweleChina ehlose ukwemba amalahle, ngakhoke zithi uhulumende kumele aziphe amaphepha elungelo lokuhlala ama Title deeds ukuze bengasuswa nje mahlayana njengalokho okuqhubekela phambili kusenzakala kwezinye izigaba ezinjenge Manicaland.
African Kimberley Process plenary meeting
Echasisa ngendikimba yalunhlangano osungulwe ngoMvulo ugqitshwa ngoLwesihlanu, uMongameli we World Diamond Council, uNkosikazi Feriel Zeroiki uthi bazololana imqondo.
“Sikubona kubalulekile ukubuthana lapha sizololonga ngezokwembiwa kwamadayimana, inhloso yethu kanye lokuphawula imthetho sisekelo esibona ingahambelana lesikwenzayo.”
Emhlanganweni lo, uhulumende uveze ukuba useqalile ukwakha isikolo sokufundisa abatsha ngomsebenzi wokwemba eMutare.
African Kimberley Process plenary meeting
Kodwa inhlanganiso ezimele amalungelo kazulu, zikhala ngokuthi uhulumende uthembisa abantu izulu lomhlaba okugoqela uhlelo lokwakhela imizi emitsha elemfanelo yonke lelungelo kulabo abasuswa emhlabathini wabokhokho sokusembiwa amatshe aligugu okuana laseMarange, kodwa kuze lalamuhla lokhu kungakafezeki ngokugcweleyo.
Your browser doesn’t support HTML5
Udaba lomhlangano ophathelane lezamadayimana siluphiwa nguNokuthaba Dlamini