Impi phakathi kwe-Israel leHamas esilenyanga iqalisile isibulalise abantu abanengi. Uhlangothi lwezempilakahle eGaza olukhokhelwa yiHamas luthi inani lasebefele kulimpi selisedlula inkulungwane ezilitshumi lengxenye (10,500.) I-Israel yona ithi inani lalabo abafayo ekuhlaseleni kweHamas e-Israel ledlula inkulungwane lengxenye (1 400).
Kuviki edluleyo amazwe amanengi agoqela iMelika kanye lenhlanganiso yomanyano wamazwe omhlaba eye-United Nations akhuthaze ukuthi kuke kumiswe impi ukuze kuphathiswe abalimeleyo eGaza kanye lokuthumela usizo kuleso sihlenge, kodwa i-Israel ithi kufanele kuqale kukhululwe abathunjiweyo.
Ngalesi sikhathi impi iqhubekela phambili, kulenhlanganiso eZimbabwe ezigoqela iAmalgamated Rural Teachers Union Of Zimbabwe –ARTUZ, Friends Of Palestine kanye le Zimbabwe Labor Center esezihlele ukutshengisela ngomgqibelo eHarare zisekela amaPhalestina njalo zikhangelele ukuyakupha isicela sazo kunhlanganiso yomanyano wamazwe omhlaba eye-United Nations.
Ekhuluma leStudio7 owayeyintathelizindaba edumileyo eZimbabwe njalo esengusomabhizimusi eBhilithane umnu Bekithemba Mhlanga ukhuthaze inhlanganiso yomanyano wamazwe omhlaba eye-United Nations kanye lamanye amazwe ukuthi angenele kulimpi akhuthaze ukuthula lokukhumisana umlotha.
Your browser doesn’t support HTML5
Ingxoxo lo Mnu Bekithemba Mhlanga Ngempi Ye-Israel leHamas