Abezomthetho bakhuthazwa ukuba bahlolisise udaba lokuthunjwa lokuhlukunyezwa kwelunga ledale lephalamende oyisiphathamandla sogatsha lwabatsha elebandla eleCitizens Coalition for Change, umnumzana Takudzwa Ngadziore bajeziswe labo abatholakala beyibo abenze lesi sihluku.
U-Ngadziore ubikwa ethunjwe lapho elubhekise edale lephalamende, wanelisa ukuzithatha i-video ngesikhathi labo bantu akade behlome ngezikhali zohlobo lweAK bemthatha.
CCC abducted MP Takudzwa Ngadziore
Abamthumbileyo laba babikwa beyemtshiya endaweni yaseMazowe elamanxeba aveza ukuba uhlukunyezwe langokutshaywa walinyazwa kakubi.
Okhokhela iqula lamalunga edale lephalamende awebandla leCCC, umnumzana Amos Chibaya utshele intathelizindaba ukuthi kuyadanisa ukuthunjwa kwamalunga abo okulokhu kuqhubekela phambili ngaphambilini langemva kokhetho olwenziwe lonyaka.
Leader of opposition in Parliament Amos Chibaya speaks on the abduction of CCC party fellow & Member of Parliament Takudzwa Ngadziore
“Sikhathazekile kakhulu, bahlatshwa ijekiseni laba bantu. Abathunjwayo bahlatshwa ijekiseni elilomuthi ongaziwayo, lokhu yimizamo yokubaqeda abalemibono eyehluke kweyeZanu Pf.”
Kodwa umqondisi obona ngokwethulwa kwemibiko kuZanu PF, umnumzana Farai Marapira uyakulandula ukuthi abebandla lakhe yibo abathumba abeCCC.
“Abukho ubufakazi balokho. Kasiqhubeni imisebenzi yokuthuthukisa ilizwe lethu ngoba ukhetho solwedlula.”
CCC abducted MP Takudzwa Ngadziore
Isikhulemeli seCCC umnumzana Promise Mkhwananzi laye usole okwenzakale kuNgadziore.
“Sithi abomthetho ababambe umthetho ngendlela abamele babambe ngayo, abantu abenze lokhu kumele babanjwe bahanjiswe entolongweni. Ilizwe leli wonke umuntu kumele azizwe ukuthi uvikelekile ngomthetho welizwe hayi ukuthi kulabantu abavikelwa ngumthetho kulabantu abanye abangavikelwa ngumthetho. So sifuna ukubona ukuthi umthetho uzakwenzani njengoba umuntu ubanjiwe, yenalowo okwenzileyo amapikitsha akhe athethwe usesaziwa ukuthi ngubani, amapholisa aselengqobe yokwenza umsebenzi wawo."
Embikweni wabo phezu kwaloludaba abe Crisis in Zimbabwe Coalition bathi kumele uhulumende abone ukuthi iyalondolozwa impilo yezizalwane zakhe zonke elizweni kungakhathalekile ukuthi ngabebandla liphi lezombusazwe.
CCC abducted MP Takudzwa Ngadziore
Isikhulumeli senhlanganiso elwela ilungelo lababalisi eyeAmalgamated Rural Teachers Union of Zimbabwe umnumzana Thembakuye Moyo uthi kuyinto eyangisayo lokho okwenzakala kulabo abakumabandla aphikisayo ikakhulu eleCCC.
"Nxa silokhe sibona abanye bedojwa ngamunye ngamunye sekusibuyisela emuva sesikhumbula iGukurahundi, lapho abantu ababedojwa ngamunye ngamunye becatsha. Siyazibuza ke umbuzo wokuthi thina ke esilwela amalungelo oluntu sivikeleke okungakanani nxa umuntu omela abantu edale lephalamende ephongudojwa nje mahlayana. Umlandu esiwutshiyela uhulumende kaMnangagwa ngothi, Mnangagwa, sivikeleke kangakanani elizweni la?."
U-Moyo uthi kumele kwenziwe uphenyo batholakale laba abenze lesi sihluku njalo bajeziswe.
"Akusiye wakuqala uNgadziwore ukuthi kuthiwa uthunjiwe and abantu abathumbayo laba bathumba bethwele iAK, umbhobho osetshenziswa ngabantu abasebenzela uhulumende osetshenziswa ngamabutho ethu osetshenziswa ngamaCIO wethu. Khonokhu kukodwa kusitshengisa ukuthi kulokubola okukhona kuhulumende, okwakuqala uhulumende engabe ezitshengisa ukuba ukhetho lolu okuthiwa lwawinwa, aluwinwanga kuhle."
Isakhamuszi saseHarare umnumzana Victor Dube uthi kuyethusa okwehlele uNgadziore.
"Angikuboni kuyinto eqondileyo njengoba khathesi siyabona sekusiba leSADC siding with them so which means sebelamandla wokuzingela abantu bonke abangabafuniyo."
Ocubungula ezombusazwe uMnu. Bekezela Gumbo owenhlanganiso eyeZimbabwe Democracy Institute, uthi kuyadanisa okwenzakala elizweni.
"I-opposition ukuze bengene eParliament bafakelwe ukuthi bayemela abantu bebone ukuthi abantu bakhulumani ePharliament labo bekhulume. Njalo iZimbabwe sihlala sikhuluma ayisiyo Democracy kodwa kuthiwa yiSecurocracy, iSecurocratic State, indlela esebenza ngayo yehlukene lazwe wonke la amanye."
Isikhulumeli samapholisa eZimbabwe Republic Police uAssistant Commissioner Paul Nyathi utshele lumsakazo ukuba ubengakawutholi umbiko phezu kokuthunjwa kukaTakudzwa Ngadziore wathembisa ukuba bazoluphenya loludaba lapho seluthe lwamangalwa emapholiseni.
Iphephandaba lebulenjini ele ZimLive lithi amadoda aphuma kuvidiyo ethethwe nguNgadziore ngabachuphi uNicholas Kajese loAbraham Pasi. I Studio7 kayenelisanga ukuzwa icele lamadoda lawa lapho sisiya emoyeni.
Lokhu ayisikho kwakuqala ukuthunjwa kwabantu e Zimbabwe ngezombusazwe. Ngenyanga edluleyo elinye ilunga leCCC, owake waba ngummeli weMabvuku-Tafara, umnumzana James Chidhakwa, laye uthunjiweyo watholakala elamanxeba wokutshaywa walinyazwa kakubi endaweni eye Acturus. Amanye njalo amalunga aweCCC, oNkosazana Joanna Mamombe, Cecilia Chimbiri, Netsai Marova bathunjwa bahlukuluzwa ngomnyaka ka2020.
Your browser doesn’t support HTML5
Udaba lokuthunjwa kukaNgadziore oweCCC siluphiwa nguMavis Gama