Iqembu leNgezi Platinum Stars linqobe eleBlack Rhinos 3 ka 0, emdlalweni weSemi-Final, yomncintiswano wenkezo yeChibuku Super Cup, odlalelwe enkundleni yeBata NgoMgqibelo emini.
Lokhu sokusitho ukuba selidlulela phambili esigabeni esilandelayo somncintiswano lo.
Ekhuluma ekupheleni komdlalo umqeqetshi weqembu leBlack Rhinos uSaul Chaminuka uveze ukudana okukhulu ngokunqotshwa kweqembu lakhe.
“Unjalo umdlalo wenguqu. Size lapha silethemba elokuba sizanqoba njalo silephupho elokumela ilizwe kuzwekazi leAfrica kodwa akusabanga njalo.
Sibatshayela ihlombe abeNgezi ngoba bebebukhali phambi kwegedi,” kutsho uChaminuka.
Umqeqetshi weqembu leNgezi Platinum Stars uTakesure Chiragwi yena uthe ukunqoba kwabo yikwenza kukaNkulunkulu.
Ngithanda ukubonga uNkulunkulu ngoba bekungekho lula kusukela kuhlandla lakuqala elomncintiswano kodwa senelise ukuphumelela hatshi ngoba sihlakaniphile kodwa kungenxa kaNkulunkulu obesipha amandla,” kutsho uChiragwi.
Elinye iqembu elizafinyelela kufinal lizabonakala kusasa ntambama ngemva komdlalo ozakuba phakathi kweDynamos kanye leCaps United enkundleni yeNational Sports Stadium.
Ifinal yalonyaka izaqhutshelwa enkundleni yeBaobab mhla zintathu kunyanga kaMpalakazi njalo iqembu elizaphakamisa inkezo lizamela ilizwe leZimbabwe kumncintiswano weCAF Confederations Cup ngomnyaka ozayo.
Kolunye udaba olumayelana lomdlalo wenguqu, iqembu lowayengumgadli wamaqembu abalisa eleHighlanders, Bulawayo City kanye leFC Platinum uMkhokheli Dube, elibizwa ngokuthi yiZebra Revolution, liyabe lidlala kusigaba seSouthern Region Division One Soccer League ngomnyaka ozayo ngemva kokuqeda lisendaweni yakuqala kusigaba seBulawayo Province Division 2.
UDube uthi abafana bakhe bakufanele ukuba bedlale kuDivision One ngoba besebenze gadalala lonyaka.
“Abafana basebenze kakhulu lonyaka ukuthi bangene kuDivision one okuyinto esithokozise kakhulu.
Sizagcina isithembiso sethu esokuthi banganqoba bangene kuDivision One njalo sizabancedisa ukuba badlale khona ngoba sebeleminyaka eminengi bedlala bebonke njalo amathuba abo awokuthi bebonwe ngamaqembu amakhulu azathuthuka nxa sebekuDivision One,” kutsho uDube.
UDube uke wadlala kweleSouth Africa lapho adlalele khona iqembu leAmaZulu kanye laseMelika lapho adlalele khona iqembu leNew England Revolution.