Owake waba ngummeli weZengeza West, edale lephalamende, uMnu Job Sikhala, uzaqhubekela phambili elokhu evalelwe esejele ngemva kokuba umthethwandaba kaMantshi owe Harare emalele imvumo yokuthi leli cala llilahlwe.
USikhala oselamalanga angakhulu amahlanu-500 esejele. Ngaleso sikhathi uphanyeke izicelo ezimbalwa ezedlula itshumi zokuthi avunyelwe ukuhlaula isibambiso sebail ukuze athoniswe evela emzini wakhe kodwa walelwa zonke lezo zicelo. Edabeni obeluthonisiswa banhlanje amagqwetha akhe abefuna ukuba umthethwandaba ululahle njengoba kungela bufakazi obucacacayo.
Esipha isinqumo sakhe kudaba lolu uMantshi Yeukai Dzuda uthe bukhona ubufakazi bokuba uSikhala watshotshozela udlakela ekubulaweni kukamuyi, uNkosazana Moreblessing Ali okwenza kwatshaywa abasekeli beZANU PF.
Ekhuluma ngokwenzekale edale Ngolwesihlanu, igqwetha lika Sikhala uMnu Harrison Nkomo uthe kusobala ukuba uSikhala kala cala.
"Esikutshoyo yikuba ubukafakazi obabekwa ngabatshutshisi buyacaca ukuba abukho egcekeni. UMantshi ukwalile lokhu wala udaba lolu walusa kumhlaka 24 Lwezi lapho azathoniswa khona "
UNkomo uqhubeke esithi kuyadanisa ukuba omunye ole cala elifana lelika Sikhala, uSithole uthonisiswa esuka emzini wakhe kodwa uSikhala uselesikhathi encitshwa imvumo yokubhadala isibambiso se bail.
Omunye wabakade besemthethwandaba ukuzolalela, uNkosikazi Ellen Shiriyedenga olilunga le CCC emele abesifazane edale lephalamende uveza ubuhlungu ababuzwayo njengebandla.
"Abantu be CCC lokhe behlukumezwa. Icala leli kalifuni ukwesulwa. Kulabantu bethu abalokhu behlukumezwa. Sibone kusenzakala kuChidhakwa "
Uthe okwenzakala kuSikhala akusoze kwanyampisa inhliziyo ukuba zingaqhubeki ngokulwisa ukuba kube lenkululeko epheleleyo elizweni.
"Njengebandla kuyasimangalisa ukuthi besabani nxa besihlukuluza kangaka. Sikukhangele lokhu sisithi okungapheliyo kuyahlola. Sizakwenza okusemandleni ethu ukuthi kuphele lokhu "
USikhala uzaphindela emthethwandaba mhlaka 20 Lwezi ukuze luqhubekele phambili udaba lwakhe, ingcitshi zezombusazwe zisithi lokhu kuveza sobala ukungahlonitshwa kwamalungelo oluntu kuleli.
Uhulumende uyakulandula lokhu esithi uSikhala kumele amelane lamacala akhe nxa emsulwa akhululwe yimithethwandaba.
Your browser doesn’t support HTML5
Udaba lukaSikhala oqhubeka evalelwe siluphiwa nguMlondolozi Ndlovu