EleBotswana lithi selibophe abantu abedlula amakhulu amabili bengena bevela eZimbabwe ukuyakwemba igolide okungekho emthethweni. Inengi lababotshiweyo ngelangena kweleBotswana okungekho emthethweni.
Usibalukhulu wamapholisa kwele Botswana, umnunzana Paul Molapise uthi kubotshwe abeZimbabwe abadlula amakhulu amabili (227) kusukela ekuqaleni komnyaka kusiyafika kuMpandula lonyaka.
UMolapise uthi ukungena kwabeZimbabwe bezokwemba igolide kuhamba lokudalwa kwamanye amacala afana lokungena elizweni okungekho emthethweni, ukuphumisa imphahla elizweni ngudlu kanye lokungena lezikhali eziyingozi okugoqela omaquphula abasetshenziswa ukwemba kudingwa igolide.
Umthambo wegolide kweleBotswana utholakala endaweni eziseduze lomngcele leZimbabwe okugoqela imizi engcelelane ledolobho leFrancistown.
Ommela indawo ezigoqela iFrancistown edale lephalamende, umnunzana Wynter Mmolotsi uthi bakhathazekile ngokungena kwabeZimbabwe bezokwemba igolide.
“Kuliqiniso ukuthi silenkulungwane le nkulungwane zabe Zimbabwe abemba igolide endaweni eziseduze leFrancistown. Abomthetho basebenza nzima ukulwisana lodubo lolu.”
Owenhlanganiso ebona ngezokwenjiwa kwamatshe aligugu eye Zimbabwe Diamond and Allied Minerals Union (iZIDAWU) umnunzana Cosmas Sunguro uthi noma nje kungekho emthethweni okwenziwa ngabe Zimbabwe ukungena kweleBotswana besiyakwemba igolide, ayisiyo nto ebamangalisayo.
“EBotswana kungaba yinto entsha kodwa kusuka kudala okufana lokuya eWenela, kodwa khathesi umehluko yikuthi sebengena besiya dinga igolide okungekho emthethweni.
Omunye oweZimbabwe ohlala eBotswana elenkampani yokwemba igolide ekhaya, umnunzana Faiton Sibanda uthi otsheketsha balandela umzila wegolide ongena kweleBotswana.
“Umthombo wegolide osuka endaweni yePlumtree ubathatha uze uyefika eBotswana. Umthetho awuvumi ukuthi bengene eBotswana kodwa bayangena belilande.”
USibanda njalo uthi abantu beZimbabwe bayenziwa yisimo somnotho ukuthi bengene eBotswana besemba igolide okungekho emthethweni.
Laye uvumelana labomthetho abeBotswana abathi bayesabela ukuthi kuzaqala ukuqhamuka udlakela phakathi kwabo tsheketsha bodwa, njalo kanye lezakhamizi.
“Ukuthi bazacina besilwa bodwa kuzabakhona bebanga indawo zokwemba. Akungeke kuselwakale, mhlawumbe sikhuluma vele sekusenzakala. AbeBotswana sebeqala ukukhonona, sebebadinga, kuzahlupha.”
Amapholisa athi abemba igolide laba bahamba bengamaqula afika noma amatshumi amahlanu, okwenza babe lakho ukubayingozi emphakathini ngoba bethwele izikhali ezitshiyeneyo.
Abachuphi bensitha ngaphansi kwenhlanganiso ye Directorate of Intelligience Services (iDIS) labo sebengenele umkhankaso obanjwe ngamapholisa lamasotsha ukulwisana labeZimbabwe abangena elizweni bezokwemba igolide okungekho emthethweni.
Kwababotshiwe, kulabanye abahanjiswe enduneni ukuyathelwa imvubu kuyisijeziso sokungena elizweni okungekho emthethweni, ngaphambi kokuba bayemiswa emthethwandaba besetheswa umlandu wokwemba igolide okungelamvumo.