Abehofisi yommeli wePalestine e Zimbabwe, baqoqe unkhosi wokuqinisana lokududuzana kuzehlakalo zempi ekhona phakathi kweIsrael leqembu lebutho eleHAMAS oqoqwe ngabenhlanganiso yeZimbabwe Palestine Solidarity Council. Abezigodlo zabammeli bamazwe atshiyeneyo eZimbabwe ikakhulu abalandela ukholo lwesi-Islam kanye lenhlanganiso abasebenzisana lazo yibo ababuye ngobunengi ukuzaqinisana labePalestine.
Abesigodlo sommeli wePalestine eZimbabwe bathethe lelithuba ukusola impi ekhona phakathi kweqembu leHamas leleIsrael abantu belizwe labo yibo abahlaselwayo okuvezwa linani lasebefele ekuhlaselweni ngele Israel. Baphinde basola eleMelika labangane balo ngokutholisa eleIsrael usizo lwezikhali ezezinga laphezulu ngenjongo yokufuna ukutshabalalisa isizwe sasePalestine.
Palestine solidarity event
U-Dr Tamer Almassri ummeli wePalestine e Zimbabwe, uthe okufunwa yilizwe lakhe yinkululeko uqobo lokubuyiselwa umhlabathi wabo owathunjwa ngabeIsrael.
"Abantu basePalestine bazoqhubeka bevikela amalungelo ethu kanye lelizwe lethu elingcwele njalo nxa bekhangelele ukuthi sizovuma ukwehlulwa, bayaziyenga."
Palestine solidarity event
Ummeli weleEgypt e Zimbabwe, uNkosikazi Salwa Mowafi laye usole kakhulu limpi ekhona phakathi kweIsrael leqembu eleHAMAS esithi okwenzakala kuzizalwane zePalestine yisihluku esikhulu.
"Kumele sibasekele abantu basePalestine ngoba balelungelo lokuzivikela, lokhu kukuziqondiso ze-UN ngakho asikusebenziseni, simise umbhuqazwe owenzakala eGAZA."
Palestine solidarity event
Kodwa ummeli wakweleIsrael emazweni amathathu angezansi ye Africa agoqela iZimbabwe, uNkosikazi Ofra Farhi uthi ukubuthana abantu besethula imibiko yokuqinisa elePalestine, akusizi lutho esithi ngoba indlela kuphela yikuthi abeHAMAS bame ukulwisana lelizwe lakhe.
"Kungani bengatsho ukuthi sekwanele bakhuthaze abaHAMAS ukuthi babeke phansi izikhali ngoba yikho okungaqeda lokhu kuxabana."
Palestine solidarity event
Kuthi abesigodlo seMelika eZimbabwe bathi bazoqhubeka besekela eleIsrael. Lokhu kuvezwe yisikhulumeli sehofisi yommeli weMelika eZimbabwe umnumzana Laurence Socha.
"AbeHAMAS abasi bantu abamela abePalestine loba ukulondolozwa kwabantu."
U-Mnu. Thabani olandela ukholo lwesi-Islam uvumelana lalokho okutshiwo ngummeli wePalestine e Zimbabwe.
"Umuntu ozivikelayo ukuthathelwa i-heritage yakhe, kalacala kodwa lo othatha i-heritage yabanye nguye nguye olecala so sikhuthaza ukuthi abantu bebambane bemise lokho okwenziwa yiu-Israel. Njalo sithi thina ebantwini abePalestine, uNkulunkulu ulani and sizafika isikhathi lelanga lokuthi kuzaphela lokhu akusoze kkuphinde wenzakale futhi."
Lokhu kusekelwe nguMnu. Thabani Mlilo obona ngezokuqhutshwa kwemisebenzi enhlanganisweni yabalobi besifazane eye Women Writers Support Network.
Palestine solidarity event
"Besilapha kuProgram leyi eyalamuhla in solidarity leEmbassy yePalestine sisima labo ukuthi sibanike umlayezo wokuthi silabo kulokhu abahlangana lakho khathesi. So sithi kubantu bePalestine, abaqine kulokho abakwenzayo khathesi silabo simi labo, and sile-hope yokuthi konke kuzaba kahle."
Abakade besemkhosini wanamhlanje ehofisini yommeli wePalestine e Zimbabwe labenhlanganiso ezisebenzisana layo, bonke bebesola kakubi ukuba mbaxambili kwamazwe angentshonalanga besithi kunje abekela eleZimbabwe izijeziso zomnotho belethesa umlandu wokwephula ilungelo loluntu kodwa esima lele-Israel lona eliqhubeka libulala abantu makhaza ikakhulu omama labantwana basePalestine okuyikwephula ilungelo loluntu.
Your browser doesn’t support HTML5
Udaba lwempi yePalestine leHamas esilwethulelwa nguMavis Gama